Rome, Risaw:
Da ki hajar ngut ki samla, la ong ba ki la mih ban ïaid paidbah ha ka Sngi Saitjaiñ ha ki surok jong ki katto- katne ki nongbah jong ka ri Italy, kynthup ïa ka Milan, Rome bad Turin katba ki bor synshar ki la phah ïa ki pulit bad ki bor pahara ban pyrshang ban khanglad ïa ka jingmih biang jong ki jingïakynad bad ki jinglute kiba la pynbud-nam ïa ki jingïakhih kiba kum kine ha ka taiew ba la dep.
Ka jingiakhih ha Milan ka la neh ha ka jingsuk, hynrei ka la don ka jingiakynad kaba lyngkot bad ki pulit ha baroh ar tylli ki nongbah Rome bad Turin.
Ha Milan, da ki hajar ngut ki samla, ki la iaid paidbah ha ki surok, katba ki shipai ki dang iaid bad ki dukan die marbam, hynrei, ha ka por mynstep, kiba bun ki dukan, ki la plie, ong ki lad pathai khubor jong ka Italy.
Ka Premier Minister ka Giorgia Meloni ka la pynbna ïa ki lad ki lynti kiba bun jait, kynthup ïa ka jingphah sa 500 ngut ki shipai sha Milan bad ka jingpynshitom kaba kham tyngeh ïa ki khynnah rit, kiba ki pulit ki la ong ba ki dei ka bynta kaba khraw jong ki nongïakhih ba shyrkhei ha ka taiew ba la dep. Ha Milan, ki pulit ki la kem ïa ki katto katne ngut ki khynnah rit kum ka lad jingiada, la iathuh ki lad pathai khubor.
Katba ki jingïakhih ha France ki la dawa ïa ka jingïakhih kaba bun na ki ri ka pyrthei, ki jingïakhih kiba heh ruh ki la pynkhih ïa kiba bun ki nongbah jong ka Europe ha ka sngi Saitjaiñ naduh Milan sha Rome haduh Madrid, Lisbon bad Tirana.
Ki jingiakhih ki kynthup ïa ki mat kiba bun naduh ka pule puthi bad ka bamsap haduh ki jingiakhih pyrshah thma, ki penshon bad ki iing ki sem.
Ha Milan, ki paidbah kiba bun bha kiba kham bun ki dei ki samla ki la ïalum lang katba ka miet ka la jan miet, ki la rwai beiñ ïa ka Meloni bad ki la bat ïa ki lama kum “Em ïa ki jinglamler jong ka jylla.”
Ka kynhun ki nongïakhih ki la bret ïa ka sboh shabar jong ka jaka pynïaid bording jong ka Italy bad ki la thang ïa ka bill bording kaba long ka dak bad kaba heh palat, la pyni da ki dur ba la pyni ha ki telebishon jong ka thaiñ.
Ki 500 ngut ki shipai kiba la phah sha Milan ki la wan nalor ki spah ngut kiba la don lypa hangtei, kiba kyrshan ïa kumba 5,000 ngut ki pulit bad kiwei kiwei ki bor pahara. Ki bor synshar ki la pyndonkam da ka jingpeit bniah da ki drone, ka jingpeit bniah ha ki steshon rel, ki jaka ai jingïarap stet bad ka jingpeit bniah online na ka bynta ki jingkhot kiba lah ban mih na ka jingïakynad.
U nongkyrmen ban long mayor, u Pierfrancesco Majorino, uba la pynbna ban iakhun ialade ha ka sngi Thohdieng, ula iadon bynta lang bad kiba iaid paidbah bad ula kynthoh haduh katno ka sngi ka long kaba suk, ong ki lad pathai khubor jong ka Italy. Un iakhun ïa ka primary na ka liang kadiang pdeng ha kaba sdang jong u snem 2027. U Mayor jong ka Milan, u Giuseppe Sala, uba la bat ïa katei ka kam naduh u snem 2016, um iakhun shuh.
Bun ki dukan, khamtam ki dukan die marbam ba heh hapoh ka jaka die jain jong ka Milan kynthup ïa ki Omega, Tiffany bad Gucci, ki la khang ïa ki jingkhang ba shakhmat jong ki. Ka dukan Apple ruh ka la khang bad ka la sahkut wat haba kiwei pat ki plie biang.
Ki nongpynkhih ha ka taiew ba la dep ki la rung shapoh ki dukan, da kaba thmu ïa ki juti ïalehkai, ki jain ïalehkai bad ki tiar ïalehkai ha ki surok kiba ïaid shabar jong ka madan Duomo pdeng jong ka nongbah.
Ki lad jingïada ki la pynïar shabar jong ka pdeng sor namar ka jingsngewkhia ba ki nongïakhih ki lah ban leit sha kiwei pat ki dong.
