Khliehriat, Nailar 27
Ka East Jaiñtia Hills District Football Association (EJHDFA) ka la sdang ïa ka lympung ïalehkai Second Division Football Tournament 2024 ha ka sngi Ba-ar ha kaba ka Musniang SC ka la khur ïa ka jingjop ha madan Artificial Turf kaba ha Deinshynrum.
Ha kane ka jingïakhun ka Musniang SC ka la lah ban pynliem noh ïa ka Kairang SC da 1-0 kol. ia kane ka shi kol la thep da u Michael Rymbai ha ka minit kaba 64.
Haba phai sha ka jingïalehkai kaba bud hapdeng ka Ladrymbai Dongwah SWSC bad ka Moosianglamare New YWOSC ki la ïasam mar shi point hadien ba ki la ïakhaid mar 1-1 kol. Ïa ka kol jong ka Moosianglamare New la thep da u Hermon Nongtdu ha ka minit kaba 19, hynrei ka Ladrymbai Dongwah ka la lah ban pynphai kylla lyngba ka jingïarap pynthep da u rangïalehkai ka liang ha ka minit kaba 54.
Ha kane ka sdang sdang jong kane ka lympung la ïadon lang ki nongïalam bad ki dkhot ka EJHDFA bad ki katto katne ki riew rangbah jong ka district.
