Amlarem, Naiwieng 02
Ka Satpator, Amjajer Roko FC ki la khur jingjop ha ka 2nd Division, katba ka Ïaikyntiew Pamtbuh ka la jop ha ka 1st Division Football League ba la pynïaid da ka Amlarem Subdivisional Sports Association (ASSA) ha ka lah sngi U Blei.
Ha ka jingïakhun jong ka Second Division kaba la long ha Mini Stadium Ladjaplem kaba ha Amlarem, ka Satpator ka la pynliem noh da 1-0 kol ïa ka Lumpyngat, bad ïa kane la thep da u Khraw Manar ha ka minit kaba 11.
Ha ka jingïalehkai kaba bud, ka Amjajer Roko FC ka la pynliem da 2-1 kol ïa ka Youth Fellow Club Trangblang.
Ïa ki kol na ka Amjajer Roko la thep da u Bhabok Langshiang (33) bad u Bit Mynsong (56), katba ïa ka shi kol ka Youth Fellow Club Trangblang la thep da u Kyrmen Diryum Rymbai (60).
Haba phai sha ka 1st Division, ka Ïaikyntiew Pamtbuh ka la jop da 2-1 kol ïa ka SS. Shnongpdeng.
Ïa ka shikol ka Shnongpdeng la thep da u Pyrkhat Lamin (40), katba ïa ki kol na ka Ïaikyntiew Pamtbuh la thep da u Rison Sumer (62) bad Shylla Suting (67) na ka bynta ban khur ïa ka jingjop.
Ha kawei pat ka jingïalehkai hapdeng ka Amlanai TC bad Amlanai YB ki la ïasam mar shi poin hadien ba ki la ïakhaid mar 1-1 kol.
Ka Amlanai ka la pynkhih jar nyngkong lyngba u Bamenri Suchen ha ka minit kaba 30, hynrei ka Amlanai ka la pynphai kylla lyngba ka penalty ba la shut da u Melari Khongiong (64).
