Shillong, Naiwieng 02
Ka jingïakynad hapdeng ki para dkhot nongkitkam jong ka Meghalaya Cricket Asso-ciation kata hapdeng u Pre-sident u James PK Sangma bad baroh kawei ka kynhun jong ka Apex Council, ka la poi syndon shaduh madan bad kane ka la wan mih paw ba ki la sei la ki jong ki kynhun ïalehkai ha ka lah sngi U Blei.
Ha kane ka step baroh ar ki kynhun ïalehkai ka Jylla ki la hiar sha madan da ka jingthmu ban ïoh shim bynta ha ka jingïalehkai ha la ïing jong ka Ranji Trophy 2026-27 pyrshah ïa ka Nagaland.
Ha kane ka jingjia, ki rangïalehkai ba la jied da ka Apex Council kiba la ïoh ban ïalehkai ha ki jingïakhun ba la lah, kim shim la ïoh jaka shuh syndon ban ïalehkai bad ki la hap ban ïeng shabar ka madan ïalehkai. Katba ka kynhun hapoh ka jingïalam u James Sangma ka la ïoh ban mih madan ban bujli noh ïa ka kynhun jong ka Apex Council.
Kane ka jingjia baroh ka dei hadien ka rai kaba la mih na ka ïingbishar jong ka Meghalaya High Court ha ka sngi Thohdieng ka taïew kaba la lah.
Hynrei hashwa ka rai na ka ïingbishar, ka kynhun ïalehkai jong ka Apex Council kaba kynthup lang ruh ïa ka kynhun ïalehkai U-23 kynthei bad shynrang, ki la dep ban mihkhmat na ka bynta ka Meghalaya ha ki lympung ïalehkai ba la pynlong da ka BCCI, kynthup ïa ka Ranji Trophy, ha kaba ka kynhun jong ka Apex Council, ki la lah ban khur jingjop shisien bad bynrap da ar tylli ki draw, kaba la biang pura ïa ka Meghalaya ban bat ïa ka kyrdan ba-ar hadien ba ka la khur 12 poiñ.
Nalor katei ka kynhun ïalehkai ha ka Ranji Trophy, ka kynhun U-23 kaba dei ban ïakhun ha ka Col CK Nayudu Trophy, la ïoh jingtip ba la dep ban bujli noh da kiwei pat kiba don ha lynti ban leit sha Sikkim na ka bynta ka jingïakhun kaba la buh ban sdang ha ka sngi Ba-ar.
Haba kren bad ki nongthoh khubor, u President ka MCA u James PK Sangma, u kren shai da kaba ong ba na liang jong u, un ym tuklar ne mushlia eiei ïa ka bor jong ka kynhun ki nongjied ïa ki nongïalehkai. U la pynpaw ba ka kriket ha Meghalaya ka la hiar bad ka thong jong u kum u nongïalam hi ka long ban ïaleh ban kyntiew biang ïa ka.
