Shillong, Naiwieng 02
Ka kynhun ïalehkai kabaddi ka Jylla ka la poi sha Bihar ban shim bynta ha ka 52nd Junior National Kabaddi Championship 2026, kaba la sdang naduh 1 tarik bad kan kut ha ka 4 tarik mynta u bnai ha Patliputra Sports Complex, Bihar.
Kane ka long sien kaba nyngkong ba ka kynhun ïalehkai kan mihkhmat sha katei ka lympung naduh ba la seng ïa ka Meghalaya Amateur Kabaddi Association (MA -KA) dangshen mynta u snem bad ka jingthmu ka long ban kyntiew ïa kane ka jingïalehkai.
Katei ka kynhun ka kynthup ïa 14 ngut ki rangïalehkai, 2 ngut ki coach lem bad uwei u Official. Kane ka kynhun ka la mih na ka nongbah ha ka 30 tarik u Risaw bad ka la poi sha Bihar ha ka sngi kaba bud.
Ïa kitei ki khynnah la jied hadien ba la dep ban pynlong ïa ka “State Junior Kabaddi One Month Training Camp” bad ka jingpyrshang jong ka jingjied ïa ki nongïa-lehkai da ka MAKA naduh 5 haduh 10 tarik u Risaw ha Indoor Stadium jong ka BSF kaba ha Umpling.
Ha katei ka prokram ki la don kumba 80 ngut ki khynnah kiba la wan na kylleng ki district jong ka Jylla, hynrei tang mar 14 ngut ki khynnah shynrang bad kynthei kiba la shah jied.
Na ka liang ka Megha-laya Amateur Kabaddi Association (MAKA) ka la ai khublei ïa ka Ama-teur Kabaddi Federation of India (AKFI) kaba la ïatrei lang na ka bynta ban pynbit pynbiang ïa ka kynhun ïalehkai ka Jylla.
Shuh shuh ka synjuk ka ai khublei kitbok ïa ki nongïalehkai ba kin lah ha ka ban ïalehkai bha ha katei ka lympung khnang ba ki lah ban wanrah nam bad burom ïa ka Jylla hi baroh kawei.
