Shillong, Naiwieng 02
U President ka Tura Golfers Association (TGA) u BillyKid A. Sangma, u la pynpaw ka jingpyrshah ïa ki bor ba dei khmih ka Shillong Golfers Association halor ka jingkyntait jong ka, ïa uwei rangïalehkai tied golf u Washington N. Marak ban shim bynta ha 17th IIM Shillong Golf Tournament 2026.
Kane ka lympung ka la sdang naduh ka sngi Saitjaiñ bad ka la poi sha kaba kut ha ka sngi U Blei ha ha madan Golflink.
Haba ïakren bad ki nongthoh khubor, u Sangma u la pynpaw ba u Washington u dei u rangïalehkai ka Tura Golfers Association bad uba la ju shim bynta ha ki katto katne katne ki lympung. “U la lah ban pyndep ïa baroh ki jingdonkam haduh ka bai rung (registration fee) kaba T. 2000 na ka bynta ban ïashim bynta ha katei ka lympung.”
U la ong ba kum kane ka jingleh kam long kaba ïahap bad ba bym lah ban pdiang namar ka long ka jingpynduh mynsiem ïa ki nongïalehkai kiba don ïa ka jingtbit ha kane ka jingïalehkai bad khamtam leilei haba u la dep ban siew ïa ka bai rung sha kane ka lympung.
“Kane ka pyni shai ïa ka mynsiem ka jingibeiñ bad ka jingkheiñ ïa u tang kum u nongrah pla na ka bynta ki nongïa-lehkai,” u la bynrap.
U la ong ba ha ka jingshisha u Washington u la long u khynnah uba tbit ha ka jingïalehkai tied golf. “Kumba ka Jylla kan pynlong ïa ka 39th National Games ha u snem ban wan, te kumta ngi dang pyrkhat ba ka long kaba biang eh na ka bynta u Washington ba un shim bynta ha katei ka lympung, hynrei ka long da khongpong namar ka jingailad ïa u ban shim bynta.”
U la ïathuh ba na ka liang ka Tura Golfers Association ka pynrem jur halor kane ka bynta, ha kaba ka la pan jingpynshai na ka Shillong Golfers Association bad ka Shillong Club halor katei ka jingkyntait ïa u. “Lada donkam ngin sa phah da ka jingthoh sha ka tnat ïalehkai jong ka Sorkar Jylla lem bad sha ka Meghalaya State Olympic Association (MSOA) ba kin tuklar lem halor ka jingkhanglad ïa ki khynnah kiba don sap,” la bynrap biang u Sangma.
