Shillong, Naiwieng 02
Ka Mawponghong SC bad ka Nongmadan SC ki la khur jingjop ha ka lympung ïalehkai 1st Division Football League ba la pynïaid da ka Tyrsad Area Sports Association, ha ka lah sngi U Blei.
Ha kane ka jingïakhun kaba la long ha madan Mawlum Tyrsad, ka Mawponghong ka la pynliem noh ïa ka Mawsawrit SC da 1-0 kol. Ïa kane ka shi kol la thep da u Rekorlang Shangdiar ha ka minit kaba 81.
Haba phai sha kawei pat ka jingïakhun, ka Nongmadan ka la jop da 1-0 kol ïa ka Mawlum Tyrsad SC.
Kane ka jingïakhun la ong ba ka la long kaba itynnad bad ïa biang bor bha. Ka Nongmadan ka la pynkhih jar nyngkong ha ka kylla step lyngba u Kyrmenskhem Nongbet ha ka minit kaba 25. Hadien kane, ka Mawlum Tyrsad ka la pyrshang ban ïakhun na ka bynta ban ïoh pynphai hynrei kam shym lah ban pynurlong.
Hashwa ban wai ka Nongmadan ka la ïalehkai sa tang 10 ngut hadien ba u Baiatyllilang Mawkhiew u la shah beh noh na madan ha ka minit kaba 73.
Kane ka lympung kan bteng biang ha ka 6 tarik ha kaba ka Thaiñthynroh SC kan ïakhun pyrshah ïa ka Mawkynroh SC ha ka por 12 baje mynsngi, katba ka Mawdngong SC ïa ka Mawponghong SC ha ka por 2:30 nohphai sngi.
