Shillong, Nailar 28
Ka Nongjri Presbyterian Secon-dary School ka la khur ïa ka nam lahduh ha ka sien kaba nyngkong eh ha ka Under-15 jong ka lympung ïalehkai 63rd Subroto Cup International Football Tourna-ment 2024, hadien ba ka la lah ban pynliem noh ïa ka Major Dhyan Chand Sports College kaba na Utter Pradesh da 3-0 kol ha ka jingïakhun final kaba la long ha ka sngi Balang ha ASC Centre Bangalore.
Kane ka la wan urlong lyngba u Prosperwell Ryntong uba la ïoh ban thep ar kol bad ïa kawei pat la pynbud da u Namebanlam Nongkseh.
Kane ka long ka sien kaba nyngkong eh ba ka Jylla ka la ïoh ban rah ïa ka nam lahduh ha kane ka kyrdan naduh ba ki bor pynïaid kane ka lympung ki la bujli noh da ka Under-15 ha ka jaka ka Under-14 naduh mynta u snem.
Haba phai sha kane ka jingïakhun final, ki khynnah ïalehkai ka Nongjri ki la pyni ïa ka mynsiem ïakhun ha kaba ka la ïoh ban pynkhih jar tang hapoh shi minit lyngba u Prosperwell. Kane ka la wan lyngba ka jingstet ki rangïalehkai ha kaba tang mar ïapashat ïa ka bol napdeng madan ki la rah beit sha kol bad ban thep hi jlang.
Kane ka shi kol ka la nangpynïoh mynsiem ïa kane ka kynhun ïalehkai ka Jylla ha kaba ka la ïoh ïa ki katto katne ki kabu ksiar, hynrei ki rangïalehkai ka liang pyrshah ki la ïakhun tyngeh na ka bynta ban pyllait na ka jingshah thep.
Hadien ba la bteng ïa ka jingïakhun jong ka kylla miet, u Prosperwell u la ïoh ban pynbud biang ïa ka kol kaba ar ha ka minit kaba 33 hadien ba ka bol ka la lait nakti jong u rangapkol katei ka kynhun kaba na UP bad utei u rangïalehkai shakhmat ka Meghalaya um shym la pynlehnohei ïa kane ka kabu ksiar.
Hashwa ban wai ka Nongjri ka la ïoh ban thep biang ïa ka kol kaba lai bad kaba khatduh lyngba u Namebanlang na ka bynta ban khur syndon ïa ka nam jop ha kane ka lympung.
Ïa ka nam Best Goalkeeper la khur da u rangapkol ka Nongjri u Thrisilbirth A. Sangma, katba ïa ka Best Coach la Ïohpdiang da u Pynkhrehlang Nongkseh uba dei u coach jong kane ka kynhun.
Lah ban pynkynmaw ba ha kane ka jingïaid lynti jong kane ka lympung, ka Nongjri Presbyterian kaba na Ri Bhoi District ka la lah ban pynliem ïa ka Bangladesh Krira Shikkha Protishtan (BKSP) da 2-1 kol ha ka semi final, kumjuh ha ka quarter final ka la lah ban pynliem ïa ka Army Boys Company 2-0 kol. Ha ki jingïalehkai group, ka Nongjri ka la lah ban pynliem ïa ka Sri Lanka da 6-0 kol, hadien ka la jop da ka ‘walk over’ ïa ka kynhun ïalehkai kaba na Madhya Pradesh, ka la shah weng noh na ka daw ba ka la pynmih da ki khynnah ïalehkai kiba palat ïa ka rta ba la buh, kumjuh da 7-0 kol ïa ka International School Sports Organisation (ISSO) bad hadien da 8-0 kol ïa ka Dadra and Nagar Haveli and Daman and Diu (DD&DNH).
