Tokyo, Nailar:
Katkum ki khubor, la ong ba ka ‘eriong ‘Typhoon Shanshan’ ka la lynshop ia ka dewlynnong Kyushu kaba don sha ka phang Shathie jong ka ri Japan ha ka step Sngi Palei, ha kaba ki bor pyniaid ka Japan ki la bthah ia ki hajar ngut ki paid nongshong shnong na katei ka dew lynnong ba kin mih noh na katei ka thaiñ bad ban leit phet pat sha ki jaka kiba kham shngaiñ, kum shi bynta ban pynkhreh bad ban ïada ia ki na ki jingma jong ka ‘eriong kaba kham jur kaba lah ban wan hadien jong katei ka jingjia.
Ka tnat treikam ba dei khmih ia ki bor mariang ka la ïathuh ba kane ka long ka eriong kaba khlaiñ tam ba ka ka Japan ka la ioh mad ha une u snem bad kaba la leit lynshop ia katei ka dew lynnong ha ka por kumba 8:00 baje ha katei ka step Sngi Palei.
U heh ka tnat ba dei khmih ia ka shlem sam bor-ding jong ka Kyushu u la iathuh ba 254,610 tylli ki iing ki la shong khlem bor-ding naduh ba katei ka ‘eriong ka la wan lynshop ia katei ka thaiñ ha katei ka sngi. Kumta, ruh utei u heh u la maham lypa ia ki paidbah ba ki lah ban dang ioh mad shuh- shuh sa ia kiwei pat ki ‘eriong kiba lah ban wan lynshop biang ia katei ka thaiñ bad na kane ka daw, kin hap ban mih bad phet rieh noh shuwa shipor katba ka jinglong- jingman jong ki bor ka mariang kam pat ailad ne ibit ia ki ban shong ha katei ka jaka.
Ha katei ka sngi, la ong ba u lap-bah uba jur uba la wanrah da katei ka ‘eriong Shanshan, u la ther ia ki nongbah kiba heh jong ka ri Japan naduh ka Sngi Palei bad kumta ruh ki bor ba dei khmih mariang ki la maham jur ia ki paidbah ba kin long ba la pynkhreh bad ban ïada ia lade na kitei ki jingjia kiba ap jingma ia ka jingim jongki.
Haba iadei bad kane, la ong ba 3 ngut ki dkhot jong kawei ka longïing ki la duh noh ia ka jingim hadien ka jingtwa khyndew kaba la tep ïa katei ka ïing ha ka nongbah Gamagori kaba don ha pdeng jong ka Aichi.
Kitei kiba khlad ki kynthup ia kawei ka longkmie kaba la don ha ki rta kumba 70 snem bad kumjuh ruh uwei u khun shynrang uba la don kumba 30 snem ka rta, katba arngut ki khun kynthei kiba la san kiba la don ha ka rta kaba 40 snem bad dei tang ma ki, kiba la lait im na katei ka jingjia ha katei ka sngi.
Ka tnat ba dei khmih ia ka jinglong- jingman jong ka suiñbneng ha katei ka ri, ka la pyntip lypa ba ka JMA ka lah ban ioh mad ia u slap uba jur haduh kumba 1,100 millimeter (43 inshi) ha ki 48 kynta haduh ka step jong ka Sngi Palei.
Ha katei ka sngi, ka Japan Airlines ka la pynsangeh noh ruh ïa ki 172 tylli ki liengsuiñ kiba dei ban treikam hapoh ka ri bad 6 tylli ki liengsuiñ kiba dei ban leit shabar ri kiba la pynbeit ban treikam ha katei ka Sngi Palei baroh shi sngi hynrei la pynsangeh noh ia ki hadien ba la iohi ia ki jingma na katei ka ‘eriong kaba la leit lynshop ia katei ka nongbah ha katei ka sngi bad la ong ba katei ka jingpynsangeh ia kitei ki liengsuiñ kiba dei ban treikam ha katei ka sngi, ka la ktah ia ki 25,000 ngut ki briew kiba dei ban pyndep ia ki kam bad ki jingleit jongki hynrei kiba la sahkut noh namar ka jingbym ailad jong ki bor ka mariang.
Kumjuh ruh na ka liang ka tnat Kyushu Railway, ka la pyntip ba ka la pynsangeh noh ïa ki katto- katne ki rel Shinkansen Bullet Train hapdeng ka Kumamoto bad ka Kagoshima Chuo naduh ka miet jong ka Sngi Palei bad ka la maham ruh ia ki jingthut kiba lah ban mih shuh shuh lada ka jinglong- jingman jong ka suiñ bneng bad ki bor mariang kam pat biang.
