New Delhi, Nailur:
Ka World Heatlh Organization (WHO) ha ka Sngi Nyngkong ka la kyntu ia baroh ki ri jong ka pyrthei kiba hap hapoh ka jingkhmih jong ka WHO jong ka South-East Asia, ba ki dei ban leh eiei noh ban tehlakam ia ka jingjur ka jingiap ki briew na ki jingjia aksiden, kiba kynthup ia ki jingiatyngkhuh kali, ki jingkylla kali bad kiwei kiwei de ki jingjia kiba wanrah ia ka jingiap jong ki mynsiem ba lui-lui kiba bunsien naduh ka rta ba 15 haduh 29 snem ki ju kham ngat bha ha kum kitei ki jingjia bad ki ju duh ei noh ia la ka jingim tang namar ka jingbym biang jong ki surok lane ki lynti- synkien.
Ki ïaid lynti kiba kynthup naduh ki nongïaid kjat, ki nongñiah ar shaka bad ki kali, ki long 66% na baroh kitei ki jingïap ha surok ba la ioh ban buh jingkheiñ da ka WHO.
Ka Saima Wazed, kaba long ka Regional Director jong ka WHO na South-East Asia, ha ka jingkren jong ka ha ka 15th World Conference on Injury Prevention and Safety Promotion (Safety 2024) kaba dang shu sdang ha ka sngi ba la leit, ka la ong ba na ka liang jong ka WHO, ka dap da ka jingsngewkhia ban iohi ia ka jingjur jong ki jingjia aksiden kali naduh ka jingiatyngkhuh kali, ka jingkylla bad jinghap ki kali ha ki surok ki bym shngaiñ bad kumta la kyntu ia baroh ki bor pyniaid jong ki ri ka pyrthei baroh kawei ba ki dei ban shim khia, da kaba pynbit-pynbiang bad peit-thuh bha ia ka jing-long-jingman jong ki surok bad ki lynti ïaid kali hapoh ka ri, kum shi bynta ban tehlakam ia ka jingiap palat jong ki briew ha kitei ki jingjia.
Shuh shuh ruh katei ka nongialam ka la ban jur ba ki surok bad ki network jong ki, ki donkam ban shna da kaba buh hakhmat eh ïa ka jingpyrkhat naka bynta kito kiba don ha ka jingma, khamtam eh ki khynnah bad ki samla, ki briew kiba don jingduna ha ki dkhot met, ki nongleit nongwan bad kiwei kiwei ki kynhun kiba rit paid.
