London, Nailur:
Ka Britain ha kane ka por ka la rai ban pynsangeh noh mardor ia 30 tylli napdeng jong ki 350 tylli ki laisen shalan tiar (Export License) bad ka Israel namar ka jingma ba ka Israel ka lah ban pyndonkam bakla ia kitei ki tiar ha ka jingiakhun pyrshah ia ka kynhun lehnoh Hamas hapoh Gaza Strip.
La ong ba hadien ba ka Labour Party ka la jop ha ka ilekshon ha u bnai Naitung, u Myntri ka tnat kam bar ri jong ka UK- u David Lammy u la ong ba un sa pynthymmai noh ïa ka jingbishar bniah halor ka jingdie bad jingshalan tiar sha ka Israel, kaba long ka paralok ba jan tam eh jong ka Britain khnang ban pynthikna ba ka kam iadie- iathied jong ka UK kam dei ban pynthud ne pynkheiñ ia ki aiñ ba la buh.
Kumta, ha ka Sngi Nyngkong, u Lammy u la ong ba u dap da ka jingsngewsih ban pyntip sha ka ïing dorbar ba ka jingbishar kaba u la ioh ka pynlong ia u ban nym lah shuh ban pynkut ia kaei- kaei lait na ka ban pyrkhing bad pynsangeh noh ia ka jingshalan tiar jong ka UK sha Israel, namar u la ong ba ka long shisha ka jingma kaba khraw ba katei ka jingshalan tiar jong ka Britain sha Israel, ka lah ban long pat ka jingpykheiñ ia ki aiñ jong ka pyrthei, kaba ki ri ka pyrthei baroh kawei ki hap ban kohnguh bad burom ia kitei ki kyndon aiñ ba la buh.
