New Delhi, Nailur:
Saw ngut ki nong India kynthup ia kawei ka kynthei ki la khlad noh ha ka jingiatyngkhuh kali kaba shyrkhei jong san tylli ki kali hapoh ka nongbah Texas katba ki dang thmu ban leit sha Bentonville jong ka nongbah Arkansas ha ka Sngi Thohdieng, ha kaba ki la iakynduh noh ia kum kane ka jingjia kaba sniewbok. Katei ka jingjia ka la pynlong ruh ia kawei ka kali SUV ba kan kem ding, ha kaba kitei 4 ngut kiba shong hapoh ki la ingkhong bad khlad hashen. Kumta, kane ka la pynshem jingeh ia ki bor pynïaid ruh ba kin pyn-ithuh ia kitei kiba khlad namar ka met jong ki ka la ingkhong lut hynrei yn sa lah ban pynithuh ia ki baroh tang ynda la pyndep ia ka jingpeit thuh lyngba ka ‘DNA Test’.
Kitei kiba khlad ki kynthup ia u Aryan Raghunath Orampati, u Farooq Shaik, u Lokesh Palacharla bad ka Darshini Vasudevan. U Orampati bad u paralok jong u- u Shaik ki dang wan phai hadien ba ki la leit jngoh ia u para jong u na Dallas. U Lokesh Palacharla pat la ong ba u dang leit sha Bentonville ban ia kynduh ia ka kurim jong u. Katba, ka Darshini Vasudevan pat, kaba la pyndep ia ka kyrdan Master na ka University of Texas, ka dang thmu ban leit jngoh ia u kpa jong ka ha Bentonville.
Hynrei la ong ba u kpa jong katei ka nong India, ka Darshini Vasudevan, u la pyntip sha u Myntri ka tnat kam bar ri ka India- u S.Jaishankar naduh ki 3 sngi ba la leit shuwa ban ioh jingtip halor katei ka jingjia halor ka jingjah jong ka khun jong u bad u la kyntu ia utei u Myntri ka ri India ban phah wad jingtip ha ki bor pynïaid ka US halor ka jingbym ioh jingtip eiei shuh shaphang ka khun jong u naduh katei ka sngi.
Katkum ki khubor ba la iohlum ha katei ka sngi, la ong ba kawei ka trok kaba iaid stet ka la ioh rat ia katei ka SUV kaba kit ia kitei kiba la khlad noh ha katei ka jingjia bad kaba katei ka kali ka la kem ding bad bthei noh syndon bad baroh kiba shong hapoh ki la khlad hashen.
Kumta, la ong ba ki bor pyniaid ki hap ban shaniah tang ha ka rukom wad bniah da kaba peit ia ki dak kti jong ka DNA, ki bniat bad kumjuh ruh ki shyieng kiba dang sah ban pynthikna ia ka met bad ka kyrteng jong kitei kiba khlad baroh.
