Angeles, Jymmang:
Kawei ka iingmala ba jrong haduh 9 mala, kaba don ha ka thaiñ North jong ka nongbah Manila hapoh Philippine, ka la khyllem noh hapdeng ka jingpyntrei ia ka, ha kaba 21 ngut ki la jah rngai na katei ka jingjia tad haduh ka Sngi U Blei. Ki kynhun iarap ki dang ialeh ban wad ia kitei kiba jah bad ki la iathuh ba ki iohsngew ruh ia ka sur bad ka jing-ud jong kito kiba la sahkut bad shah tap ha kitei ki kynrum- kymram na katei ka jingtwa, katba 24 ngut ki nongtrei ki la lah ban phet krad sha ka jaka ba shngain ne la pyllait im ia ki, la iathuh ki pulit bad kiwei kiwei ki heh sorkar.
Kane ka jingtei ka la khyllem hadien ba la don ka jingpom u pyrthat uba khlaiñ bha ha ryngkat ka lyer kaba jur ha ka nongbah Angeles jong ka jylla Pampanga. Palat 100 ngut ki pulit bad kiwei kiwei ki briew sorkar ki la ialeh ban pyllait im ia kito kiba la ngeit ba ki la sahkut ha ki kynrum- kymram kiba la julor na katei ka jingtwa katei ka iingmala kaba heh bha, la iathuh u pulit u Brig. U Gen. Jess Mendez.
U Mendez bad kiwei de ki heh kiba don ha katei ka jaka, ki la iathuh ba ym shym la don kano- kano ka khubor ban ioh halor ka jingdson kiba khlad noh na katei ka jingjia hynrei la ngeit ba kitei kiba sahkut hapoh ruh ki don hapdeng ki jingmynsaw na katei ka jingjulor katei ka iingmala kaba dang don hapdeng ka jingpyntrei. Napdeng ki 21 ngut ki briew kiba dang jah rngai khlem jingtip, kiba bun la ngeit ba ki dei ki nongtrei jong katei hi ka jaka pyntrei, kat-kum ka jingiathuh jong u Francis Pangilinan uba don ha katei ka jaka.
Arngut kiwei pat, kynthup ia uwei u nongjngohkai pyrthei na Malaysia, ki la mynsaw, haba ka jaka sah jongki, ka la shah pynjulor ha ka jingtwa jong katei ka iingmala kaba jrong.
