New Delhi, Jymmang:
Ha kane ka jingjia, la ong ba 24 ngut ki la khlad noh bad da ki phew ngut kiwei ruh ki la mynsaw hadien ka jingbthei jong uwei u bom hajan ka lynti rel kaba don sha ka thaiñ Southwest jong ka nongbah Balochistan, ha kaba, la suba ba utei u bom u dei uba la thmu ia ka rel kaba dei ban ïaid na katei ka lynti ïaid bad ka dei ruh ka rel ka ban kit ia ki bor pahara jong ka Pakistan.
Katkum ki khubor, la iathuh ba katei ka rel, ka la pyni ia ki dak jingma ha ka por ba ka poi ha Chaman Pattak jong ka Quetta, hadien ba kawei ka kali, kaba la pyndait da ki tiar pynbthei, ka la tynrah ia kawei na ki kali jongka bad kaba la wanrah ia katei ka jingbthei kaba jur ha katei ka jingjia.
La ong ba napdeng jong kitei kiba khlad ha katei ka jingjia, kiba bun hi ki dei ki shipai bad kiba ha-iing jongki kiba dang thmu ban leit sha Peshawar. Kitei ki dei kiba leit ban rakhe ia ka shuti Eid, kaba la dei ban sdang naduh ka Sngi Ba-ar. Ka jingkhlaiñ jong katei ka jingbthei ka la pynlong ia ar tylli ki kali rel ban kylla bad kem ding. Hadien katei ka jingbthei bad jing kemding, la iohi ia ka tdem kaba iong bad kaba rben bha kaba mih na katei ka jaka bad kaba kiew kiew shalor suiñ.Ki dur ki pyni ruh ia ka kali rel kaba la shah pynpra ha ka liang jong ka katba ki briew ki dang kiew halor ki jingtwa ban wad ia kiba lait im.
Ha ki dur bad video ba la saphriang paidbah ha ki rynsan ‘Social Media’ la iohi ia ki briew ba ki dang ia rah bad sei ia kitei kiba la mynsaw bad kiba khlad ha katei ka jingjia.
La ong ruh ba wat ki kali kiba ieng kumba 25 meter haduh 30 meter na katei ka lynti rel ruh ki la julor lang bad hajan jongki, kawei ka iing kaba bun mala ka la shah ktah bad julor lang ha katei ka jingbthei.
