Washington, Jymmang:
U Vice President jong ka US, u J D Vance, u la ong ba ka jingdon jong ka Iran ïa u tiar thma ‘atom’ kan wanrah ïa ka “jingïakhun tiar nuclear” ha kylleng ka pyrthei bad pynskhem ba ka US ka la “khang ban ailad ïa ka jingbuh ïa kum kitei ki jait tiar kiba shyrkhei” ban sdang biang ïa ki kam shipai lada ka Iran kam lah ban poi sha ka jingïateh kular.
Kane ka jingkren jong u Vance ha ka jingïalang bad ki nongthoh khubor ha White House ha ka Sngi Ba-ar ka la jia shisngi hadien ba u President Donald Trump u la pynjlan ïa ka rai ban sdang leit hiar thma biang pyrshah ïa ka Iran halor ka jingkyrpad jong ki ri Arab, kynthup ïa ka Qatar bad ka UAE, kiba la ong ba ka Iran ka la don ban ïakren ïasuk noh. “Ngi pyrkhat ba ki nong Iran ki kwah ban iateh kular. U president jong ka America u la bthah ïa ngi ban iakren da ka jingmut kaba bha. Bad kata hi ka dei kaba ngi la leh,” la ong u vice president.\ Hynrei u Vance u la maham ba ka jingïadei pyrthei kan ym wan ha ka dor jong ka jingdawa ba kongsan jong u Trump ba ka Iran kan ym ïoh satia ïa ki tiar nuclear.
“Kumta kumba u president u dang shu iathuh ïa nga, ngi la shah khang bad shah pynkit”, la ong u Vance bad bynrap ba u la don ka jingialang bad u Trump shwa ban wan sha ka jingialang bad ki nongthoh khubor. “Ngim kwah ban iaid ha kata ka lynti. Hynrei u president u kloi bad u lah ban iaid ha kata ka lynti lada ngi hap ban iaid,” la ong u vice president. U Vance u la ong ba ka US ka don ïa ka “jingtyrwa kaba suk” bad ki don “ar tylli ki lynti ban hiar”.
“Ka Iran kam lah ban don ïa u tiar nuclear”, u la ong bad bynrap ba lada ka Tehran ka ïoh ïa u, kan phah ïa kiwei pat ki jaitbynriew ban “ïalehkai” ban ïoh ïa la ka jong, kaba pynlong ïa ka jingïakhun tiar nuclear.
“Ka Iran kan long shisha ka domino kaba nyngkong eh ha kaei kaba lah ban sdang ïa ka jingïakhun tiar nuclear ha kylleng ka pyrthei,” u la ong.
“Lada ki nong Iran ki ïoh shisha ïa u tiar nuclear, ngi tip ba bun ki jaitbynriew ha kylleng ka Gulf kin kwah nangta ïa la ka jong ka tiar nuclear, bad nangta bun ki jaitbynriew ha kylleng ka pyrthei,” ong u Vance.
“Kum u kpa jong lai ngut ki khynnah rit, ngam kwah ba kin ioh pateng ïa ka pyrthei ha kaba 20 tylli ki jingsynshar ba la pyndap-shiteng na ki ki long kiba ma bha bad kiba sngewsynei bha ïa ki lehnoh-ki don ïa ki tiar nuclear,” la ong u Vance.
“Ngi kwah ban pynduna ïa ka jingdon jong ki ri kiba don ïa ki tiar nuclear, bad dei na kata ka daw ba ka Iran kam lah ban don ïa ki tiar nuclear. Halor kiwei pat kiei kiei kiba ngi lah ban sngewkhia, ba ma ki hi ki lah ban pyndonkam ïa ka, ba ki lah ban pyndonkam ïa ka kum ka jingpynbor ha ka jingpyniaid ïa ka ioh ka kot ne ka jingiakren ïa ka ioh ka kot. Ngi shu kwah ba kin don ïa ka tiar nuclear,”
la ong u Vanceapon.
