Washington, Jymmang:
Ka NATO ka dang ïakren halor ka lad ban ïarap ïa ki lieng ban ïaid lyngba ka wah Hormuz kaba la khang lada ym plie biang ïa ka lynti um ha ka taiew ba sdang u Naitung, ong u heh ophisar jong ka kynhun shipai.
Kane ka mat ka la ioh ïa ka jingkyrshan na ki katto katne ngut ki dkhot jong ka North Atlantic Treaty Organisation, hynrei kam pat ioh ïa ka jingkyrshan kaba donkam kaba ïa mynjur lang, la ong u nongmihkhmat na kawei ka ri NATO. Baroh arngut ki heh sorkar ki la kren khlem da kwah ban pynpaw kyrteng. Ki nongialam na ki ri kiba don ha ka NATO kin ïa kynduh ha Ankara ha ka 7 -8 tarik u Naitung.
Kum kane ka jingleh kan pyni ïa ka jingkylla ha ka buit treikam jong ka kynhun shipai sha ka thma jong ka US bad ka Israel ha Iran. Haduh mynta, ki paralok ki la kyntait ba kin ïadon bynta tang ha katei ka duriaw ynda la sangeh ka jingïaleh bad ki lah ban thaw ïa ka kynhun synrop kaba heh kaba kynthup ïa kiba bun ki ri ki bym dei na ka NATO.
Hynrei ki jingeh ha ka liang ka ioh ka kot ki nang jur, da ka jingkhang jong ka strait kaba phah ïa ka dor jong ka bor ding ban kiew sha jrong bad ki jingkhein jingdiah jong ka jingroi ki nang hiar.
U nongaiktien jong ka seng North Atlantic um shym la jubab mardor halor ka jingkyrpad ban ai jingmut.
Ha kaba sdang ka Iran ka la khang ïa ka duriaw Hormuz – kaba ïaid lyngba kumba shi bynta na ka san bynta jong ka umphniang bad ka lyer um ha ka pyrthei – hadien ba ka US bad ka Israel ki la sdang ban bom ïa katei ka ri ha kaba kut jong u bnai Thowbah.
Katei ka lynti ïaid, naduh katei ka por, ka la kylla long ka tynrai jong ka jingïakynad hapdeng ka US bad ki paralok jong ka na Europe kiba don ha ka NATO, kiba la kyntait ban sngap ïa ki jingdawa jong u President Donald Trump, ba kin ïarap ban plie biang ïa katei ka duriaw.
U Trump u la bitar bunsien halor katei ka jingkynthoh bad dang shen ka Washington ka la pynbna ba kan weng noh ïa ki 5hajar ngut ki shipai na Germany.
U heh jong ka NATO u la ong ba katba ki don ki paralok kiba dang pyrshah ban ai bor ïa ka mishon ïatreilang na ka bynta ka duriaw bah, kin ïalum lang ha kylleng ka jingmut lada ka jingkhanglad ka dang ïai bteng.
U nongmihkhmat jong ka NATO u la ong ba katto katne ki paralok ki kyrshan shisha ban rung shapoh ban ïarap ban plie biang ïa katei ka duriaw, hynrei u la maham ba kiwei pat ki dang sngew artatien ban shah rong noh ha katei ka jingïakynad.
Katto katne ki dkhot jong ka NATO kum ka Spain ki la long kiba khlem jingartatien ha ka jingpyrshah jong ki ïa ka thma. Ka Madrid ka la khang wat ïa ka US ban pyndonkam ïa ka jaka suiñ bad ki jaka sah jong ka ban hiar thma
ïa ka Iran.
Hynrei kiba bun ki paralok ki la ailad sngap jar ban rung sha ki jaka sah jong ki ban ai jingkyrshan ha ka liang ka jingdonkam.
Ka kynhun synrop ba la ïalam da ka France bad ka UK ka dang shna ruh ïa ka plan ban ïarap ban pynskhem ïa ka jingïaid lynti ha ka duriaw bah Hormuz ynda ka jingïaleh ka la jem. Katto katne ki ri ki la buh wat ïa ki marpoh khyndew ha katei ka jaka kum ka jingpynkhreh.
Kata kam shym la biang ban pynhun ïa u Trump, uba ka jingbitar jong u ka la long kyrpang ïa ka Germany. Hynrei haduh mynta, ka US kam pat shym la kyrpad satia ïa ka jingdonkti jong ka NATO ha katei ka duriaw, ong ka khubor jong ka Bloomberg mynshwa.
