Shillong, Nailur 04
Ka Langsning Football Club kaba long kawei na ki klob kaba rim tam ha ka Jylla, ka lah ban khang khyrdep noh shi syndon na ka kam pynïaid phutbol hadien ba u nongkyrshan ba radbah bad uba long ruh u nongbei tyngka ïa kane ka klob naduh ki phew snem kiba la leit, u la weng noh shi syndon na kane ka klob naduh mynta u snem.
Kat kum ki khubor la ong ba kane ka klob ka la pyntip sha baroh ki rangïalehkai lyngba ki bor pynïaid da kaba ong ba kane ka klob kan pynkut noh shi syndon na ka jingpyntyllun shaphrang ha ka jingïalehkai phutbol.
Watla kane ka khubor ka la sdang ban saphriang ha baroh ki rangïalehkai phutbol jong kane ka klob, hynrei na ka liang u nongthoh khubor u la pyrshang ban wad jingtip na ki bor pynïaid jong kane ka klob bad ka jubab kaba la ïoh ka long ba kim pat lah ban pynthikna halor kane ka bynta bad ki la shu ai ksai ba shen kin sa ai jingtip halor kane ka bynta.
Kumba ka long mynta kane ka klob kam shym la soi ïa ki rangïalehkai na ka bynta ka aïom ïalehkai mynta u snem bad ka la thmu ban pynïalehkai da kijuh kiba la dep soi ha ka aïom ba la lah, hynrei mynta kine ki rangïalehkai ki la sah ha ka umdum namar ka Inter Club Transfer jong ka SSA bad kumjuh ka Inter District Transfer jong ka Meghalaya Football Association ki la poi sha kaba kut.
Lah ban kdew ba ka jingïadei kaba jan hapdeng ka Langsning bad utei u nongbei tyngka u Bah Rishan Rapsang ka la long da ki phew snem naduh ba la pynduh noh ïa ka Blue Max SC bad haduh mynta u dangïai long u nongkyrshan ba radbah jong kane ka klob.
Kane ka klob ka la ïai neh la bun snem ha ka Super Division (ïa kaba la tip mynta da ka Shillong Premier League) ba la pynïaid da ka Shillong Sports Association bad ka la khur teng ruh ïa ka nam lahduh.
Shuh kane ka klob ka la ïashim ha ka Second Division I-League da ka jingthmu ban ïoh rung sha ka I-League ha ki snem kiba la leit, hynrei kane ka klob kam shym la lah ban kynjoh sha ka thong.
Kumba ka paw kane ka klob ka la lah ban sei ïa bun bah ki rangïalehkai ka Jylla bad kiba la long ki khur ïalehkai kiba kynsai naduh ki snem kiba la leit.
