Kolkata, Nailur:
Hapdeng ka jingïahylla, ka Sorkar West Bengal hapoh ka jingïalam ka Mamata Banerjee ha ka Sngi Ba-ar jong ka taïew da kawei ka sur ka la mynjur ïa ka Aparajita Woman and Child (West Bengal Criminal Laws Amendment) Bill, 2024, kaba ai jingmut, nalor kiwei-kiwei ki kyndon, ka jingpynshitom (death penalty) na bynta u nongleh be-ijot lada jia ba ka lanot ka ïap.
Ïa katei ka ‘Bill’ la mynjur hapoh ïingdorbar ha ryngkat ka jingkyrshan da ki dkhot ka liang pyrshah – Bharatiya Janata Party (BJP), ha ryngkat ka jingpynpaw da kaba hylla na ka liang ki dkhot katei ka seng ha ka por ba ka Myntri Rangbah ka kdew ba ka jingdon jong ki kam thombor pyrshah ïa ki kynthei ka jur bha ha ka Jylla ba synshar ka BJP kum ha Uttar Pradesh bad Gujarat.
Ïa kane ka ‘Bill’ mynta yn sa phah sha u Lat ka West Bengal, u C.V. Ananda Bose bad hadien kane sha ka President, Droupadi Murmu na bynta ka jingmynjur jong ki.
Ka Myntri Rangbah ka la ñiew ïa kane ka ‘Bill’ kum ka ban sah kynmaw pateng-la-pateng bad ka jingkynmaw burom ïa ka doktor kaba la shah pynïap ha kawei ka kolej bad jaka sumar kaba ha Kolkata mynshem bnai.
Ka West Bengal mynta ka la long ka Jylla banyngkong eh ban wanrah jingkylla ha ki aiñ ka Sorkar Pdeng haba ïadei bad ka be-ijot bad ki kam thombor.
Ka Banerjee, haba kut jong ka jubab jong ka, ka la ther tyngeh ïa u Myntri Rangbahduh ka ri, u Narendra Modi bad dawa ïa ka jinghiar shuki jong u.
Ka la ong, “Ka jingleh be-ijot mynta ka long ka jinglehraiñ ïa ka ri. To ngin ïawan lang na bynta ka jingkylla ha ka imlang-sahlang kaba donkam eh ban khang lad ïa ki kam leh be-ijot.”
Katkum ki kyndon pyrkhing jong katei ka ‘Bill’, u nongleh be-ijot un shah sdien phasi lada ka kam be-aiñ jong u ka ïalam sha ka jingïap jong ka lanot ne pynlong ïa ka ban don ha ka jingbym tip briew (vegetative state). Ka ‘Bill’ ka ai jingmut ruh ban set along shirta jingim khlem ka jingai jingbit ban mih noh hashuwa na along lada pyni ïa ki jinglong ba bha (parole) na bynta kito kiba shah rai pynrem halor ki kam leh be-ijot.
Katei ka ‘Bill’ kaba la wanrah da u Myntri ka tnad aiñ, u Moloy Ghatak, la mynjur da kawei ka sur hadien ka jingïatai bad ka jubab na ka liang nongïalam ka ïing bad ka Myntri Rangbah ka Jylla, ka Mamata Banerjee.
U Lamphang, u Biman Banerjee u la pynbna ba la mynjur ïa ka ‘Bill’ bad pynkut noh ïa ka ïing ha kaba kut jong ka Dorbar kyrpang kaba ar sngi.
Ha ka jingïatai, u nongïalam ka liang pyrshah, u Suvendhu Adhikari, haba kyrshan ïa ka ‘Bill’ u la ong sha ka ïing ba ka dei ka kamram jong ka Sorkar ban pyntikna ba ka ‘Bill’ ka long aiñ bad ban pyntreikam noh kloi ïa ka.
Shuh shuh u Adhikari u la aiti ïa katto-katne ki jingthoh haba ïadei bad ka jingwanrah jingkylla, kiba la shah kyntait da u Lamphang. Hadien kane, la sakhi ïa ki MLA ka BJP kiba ïa hylla bad pyrta bad dawa hiar shuki ïa ka Myntri Rangbah da dawa ruh ïa ka hok na bynta katei kaba sha pynïap.
