Shillong, Nailur 05
Ka Langsning Football Club ka la rai ban ïai bteng ïashim bynta ha ka lympung ïalehkai Shillong Premier League mynta u snem ka ban pynïaid da ka Shillong Sports Association.
Kane ka la wan hadien shi sngi ba la mih khubor ba kane ka klob kaba la rim tam ha ka Jylla, ka la rai ban khang khyrdep noh shi syndon ha ka kam pynïaid phutbol hadien ba u nongkyrshan ba radbah bad uba long ruh u nongbei tyngka ïa kane ka klob naduh ki phew snem ba la leit u la weng noh shi syndon na kane ka klob naduh mynta u snem.
Kat kum ki khubor na kane ka klob ki la pynpaw ba hadien ba la mih ki khubor, na ka liang u Bah Rishan Rapsang uba long u nongkyrshan ba radbah jong kane ka klob, u la rai ban bteng biang ban kyrshan ïa kane ka klob na ka bynta kane ka aïom ïalehkai mynta u snem.
Kat kum ki kyndon pynïaid phutbol jong ka SSA, la ong lada kano-kano ka kynhun kan ym ïashim bynta shi snem, kan shah pynhiar kyrdan bad kan hap ban sdang ïashim bynta naduh ka Fourth Division lada ka ïashim bynta ha u snem ba bud.
Wat la kane ka klob kam shym la soi ïa ki rangïalehkai kiba thymmai ha ka Inter Club Transfer mynta u snem jong ka SSA bad kumjuh ha ka Inter District Transfer jong ka Meghalaya Football Association, hynrei la ïathuh ba kan sa wanrah katto katne ngut ki rangïalehkai kiba nabar na ka bynta ban pynkhlaiñ ïa ka klob.
Kumba ka paw ka lympung ïalehkai SPL jong ka Shillong League kan sdang noh naduh u bnai ban wan. Kumta ka Langsning ka dang don por sa kumba shi bnai ban pynkhreh ïa kane ka lympung.
