Shillong, Nailur 06:
U Myntri Rangbah ka Jylla, u Conrad K Sangma, mynta ka sngi, u la ïashimbynta ha ka jingïalang ai khublei ïa ki nongjop ha ka World Arm Wrestling Championship kaba la long ha Moldova. Ïa kane ka prokram la pynlong da ka Meghalaya Arm Wrestling Association ha KJP Assembly Hall bad la ïashim bynta ruh da u Myntri ka tnad ïalehkai, u Shakliar Warjri u MDC ka Malki, u Director ka tnad ïalehkai, u Pastor Bantei Mylliempdah, President bad Secretary ka MSOA, Sports Secretary ka KSU Central Body, bad u Vice President jong ka FKJGP nalor ka longïing jong ki nongjop.
Ha ka jingkren plie jong u Myntri Rangbah ka Jylla, u Conrad K Sangma u la ong, “Ngi tip ba kam long kaba suk ban jop ha ka kyrdan jong ka pyrthei ha kano kano ka kam ïalehkai bad ngin mutdur ba kan donkam ïa ka jingsngewtynnat, ka jingaiti lut, ka jingïaishah bad ka jingtrei shitom bad ngim ju poi pyrkhat ba ngin pynmih ia ki nongjop na ka jylla kaba rit kum ka jong ngi bad kane baroh ka long da ka jingaiei U Blei. Nga sngew-kmen ba nga la lah ban ïarap ha kano kano ka rukom ha ka liang ka pisa na Chief Minister’s Development Fund. Ka long ka jingbei tyngka ha ka jingim ym tang ha ka sngi pynkupburom hynrei ruh ka jinglong ba thymmai, ka jinglong ba ryntih bad ka jinglong rangbah ban pdiang wat ïa ka jingshah rem kaba ka sorkar ka la pynbor ha kine ki khyndiat snem ba la leit noh.”
Haba kren shaphang ki jingthmu jong ka sorkar ban pynbha ïa ka kam ïalehkai, u Myntri Rangbah u la ban jur ba ka Sorkar ka la bei tyngka shibun eh ha ki jingtei ïa ka kam ïalehkai ha kine ki khyndiat snem ba la dep. U la ong shuh shuh ba ïa ki seng ïalehkai bapher bapher ha ki bynta bapher bapher ruh la ai jingïarap pisa ban pynbha bad pynïaid ïa ki kam ïalehkai bad bynrap ruh, “Ka don ka jingktah jong ka Meghalaya Games ha kaba ka don ka jingpynbha ha ki jingtei ym tang ha ki jingdon jingem hynrei ha ki jingtei ha ki skul.
Ka don ka jingpynkylla ïa ki jingtei ha kaba la pynlong ïa ki jingïalehkai.”
U Myntri Rangbah ka Jylla u la pynbna ruh ba kan don ka lympung ïalehkai phutbol ka Inter Constituency Football Tournament ha kaba baroh 60 tylli ki kynhun na baroh ki Konstitwensi kiba ïakhun ha kaba yn pynlong hadien ka Meghalaya Games. U la ong ba kiwei pat ki jait jingïalehkai kin bud bad kin ïoh ïa ka jingkyrshan bad ki rynsan na ka bynta ka jait jingïalehkai jong ki ban ïoh ïa ka nam.
Ha ka jingkren jong u Myntri ka tnad ïalehkai, u Shakliar Warjri, u la ai khublei ïa ki nongïalehkai kiba la jop bad ai mynsiem ïa ki da kaba bynrap ba ka sorkar kan bteng katba lah ban kyrshan ïa ka State Arm Wrestling Association.
Ki nongïalehkai kiba la shah pynkup burom ki kynthup ïa:
Senebi Syngkli (ka nongïoh takma rnong ha ka jingïakhun kti kadiang bad kamon ki kynthei 55 kg ki samla), ka Mihsngewbha Rymbai (ka nongïoh takma rupa baroh ar ha ka kti kadiang bad ka kti kamon jong ki kynthei Grandmaster 80 kg), ka Starina Jasaiñ (ka nongïoh takma rupa ha ka kti kadiang bad kti kamon ki kynthei 60 kg grandmaster), u Hubert Paliar (ba la ïoh takma rnong ha ka kti kadiang jong ki shynrang 60 kg Para Senior HI), ka Margaret Pathaw (ba ïoh takma rnong ha ka kti kadiang bad ka takma rupa ha ka kti kamon ki kynthei 60 kg), u Donbor Rumnong u la jop kum u Mr Asia Pacific Senior Category uba la ïoh ïa ka takma ksiar bad ka Overall Men’s Physique 2024 bad u nongïalehkai ba nyngkong eh na ka jylla Meghalaya ban ïoh ïa ka PROCARD sha Philippines, Manila City. U Bah Johnny Nongrum u dei u nongjop ha ka Middle Weight 6th Bidang Fighting Championship.
Ka Team India ka la ïoh ban khur haduh 15 tylli ki takma ha ka World Arm Wrestling Championship kaba la long ha Moldova ha kaba 9 tylli ki takma la ïoh da ki nongïalehkai na Meghalaya.
