Moscow, Nailur:
U President jong ka Russia, u Vladimir Putin, ha kane ka por u la pynpaw ia ki jingthmu bad jingangnud ba ka Russia ka don da kaba leit hiar thma ia ka Ukraine ha kane ka sien. Ka jingthmu ba kongsan jong u ha Ukraine hadien 30 bnai jong ka jingiakhun thma, ka long ban knieh ia ka thaiñ Shatei jong ka Donbas bad u la kynnoh ruh ba ka jingpynleit jingmut jong ka Ukraine ban ïakhun thma ha Kursk, ka la nang pynsuk ia ka Russia ba kan poi sha katei ka thong ba ka la buh naduh kaba sdang.
U Putin, u la kren ia kane tang hadien shisngi ba ka Russia ka la leit hiar thma biang ia ka thaiñ Lviv kaba don sha ka phang Shathie jong ka Ukraine, da ka jingleit hiar thma kaba la shim ia shibun ki mynsiem briew bad ka long ruh tang hadien katto katne taiew ba ki shipai jong ka Russia ki la leit hiar thma sha Donbas.
Naduh ba sdang ka jinghiar thma jong ka ha u bnai Rymphang jong u snem 2022, ha kaba ka Russia kam shym la lah ban ioh knieh suk ia ka bor na ka Ukraine, ka Russia ka la pynthymmai bad nang pynïar ïa ki jingthmu jongka, da kaba pynleit jingmut ha kitei ki bynta kiba kan kham suk ban ioh knieh bad da kaba pyrshang ruh ban jop shuwa na ka bynta Mihngi jong ka Ukraine.
Katba ka jingleit hiar thma ba kynsan jong ka Ukraine sha ka thaiñ Kursk jong ka Russia ha ka taiew ba la dep, ka la pynlong ïa ki shipai jong ka Russia ban kyndit bad shaïong ngaiñ, ha kaba u Putin u la ban jur ba katei ka jingleh kam shym la lah ban pynslem ne khang ïa ka jingïaid lynti jong ka Russia sha Ukraine.
