Shillong, Nailur 06
Ka Muay Thai Association of Meghalaya ka la pynbna ïa ki kyrteng ki nongïalehkai ki ban leit ïashim bynta ha ka lympung ïalehkai IFMA Youth World Championship Muaythai ka ban sdang naduh 11 haduh 20 tarik mynta u bnai ha Bangkok, Thailand.
Ka jingjied ïa ki nongïalehkai ka long lyngba ka jinglah ban ïalehkai bha ha ka National Muaythai Championship kaba la long ha Laxmi Bai Physical Education Tapesia Sonapur kaba ha Assam naduh 25 haduh 30 tarik u Jymmang mynta u snem.
Ki kyrteng ki nongïalehkai ki kynthup ïa ka Dasngewtngen E. Nongrum (30 kg) na Umsaw Nongkharai, Ri bhoi Dist), Alphonsa Ziania Wriang (35 kg) na Umsaitsning, Ri Bhoi, Mary Christine Wriang (42kg) na Umsaitsning, Ri Bhoi, Aitilin G. Kharbyngar (36kg) na Umsaw Nongkharai, Jenefer Mukhim (54kg) na Mawkynrew, East Khasi Hills bad ka Madona Taro (34kg) na Rongmesek, Ri Bhoi.
Ha ka liang ki shynrang ki long u Teiboklang Marbaniang (51kg) na Mylliem, East Khasi Hills, Dameshuwa Marten (54kg) na Umbuda, Ri Bhoi, Bansahnamkyrpang Warkhyllew (45kg) na Nongkrem, East Khasi Dist bad u Andy Taro (58kg) na Rongmesek, Ri Bhoi Dist. Katba ki Rephri bad ki nongbishar ki long u Bah Angelus Sun bad u Pynsuklang Sumer Jatah.
