Shillong, Naitung 14
Ka Meghalaya State Olympic Association (MSOA) ka la lum lang ïa ki nongïalam shnong bad Seng Samla jong ki 15 tylli ki shnong ka thaiñ Sohra ha ka 10 tarik mynta u bnai ha CP School Nongsawlia.
Kane ka jinglum lang ka long shi bynta ka jingpynkhreh ïa ka 5th Sohra International Half Marathon kaba la thmu ban long ha ka 4 tarik u Nailur.
Kat kum ka kyrwoh la ong ba katei ka jingïalang ka long shi bynta ka jingpynkhreh na ka bynta katei ka marathon, ki jingtyrwa bapher bapher kiba la wanrah na ka bynta ban pynïaid beit ïa kane ka jingïakop.
La ong ba ka jingpynrung kyrteng ki nongwan shim bynta haduh ka 14 tarik mynta u bnai ka long 6447 ngut. Na ka liang katei ka synjuk ka la kyntu ïa ki nongshim bynta kiba don jingthmu ba kin ïaleh ban ai ïa ki kyrteng jong hashwa ïa ka por bad ka la ong ruh ba kan ym ailad ïano ïano mar ïadap 11,000 ngut.
