Aizawl, Nailur:
Hadien ba la ïoh ban kurup ïa ki tiar siat bad pynbthei kiba bun ïa kiba la pynshisha ba ki dei kiba la khaïi beaiñ na Mizoram sha Myanmar la ïoh jingtip ba la thmu ban shalan sha ki kynhun lehnoh halor ka jingthmu jong ki ban ïakhun pyrshah ïa ki shipai lada jia ba don kino kino ki jingïaleh. Ha kaba ïadei bad kane, na ka liang ka kynhun tohkit jong ka National Investigation Agency (NIA) ka la mudui da ka mukotduma pyrshah ïa 10 ngut ki riewshimet ha kaba ïadei bad ka kam kurup tiar siat bad tiar pynbthei kaba bun ha Mizoram, kaba don jingïadei bad ki kynhun lehnoh kiba don ha Myanmar.
Kitei kiba la kynnoh, kynthup ïa kiba bun ki phetwir kiba sah na Myanmar, ki la shah kynnoh ba ki la don bynta ha ka kynhun khaïi ïa ki tiar pyndonkam, ki tiar siat, bad ki tiar pynbthei kiba treikam ha khappud Indo-Myanmar.
Kane ka mukotduma, kaba la buh jingmudui ha u bnai Jymmang, 2022, ka dei hadien ka jingïoh kurup bun tylli ki tiar pynbthei, ki tiar siat, bad ki kuli na ki ar tylli ki kali kiba don harud jong ka shnong Kelsih ha Aizawl distrik. Ha kaba ïadei bad kane, la kem ïa saw ngut ki nongshong shnong, ha kaba kane ka la pynlong ïa ka jingpynpaw ïa ka jingthmu jong ki lehnoh kiba don ha Myanmar ban ïoh tiar bad ban ïakhun shitom na ka bynta ka jingpynïoh tiar siat.
Ka jingtohkit jong ka kynhun NIA ka la pynpaw ba ka la don ka jingïadei hapdeng ki nong Myanmar kiba don ha Aizawl bad ki nongdie tiar pynbthei ba la ai License, kiba thied bad kit ïa ki tiar pynbthei kiba bun sha ki kynhun kiba don ha Myanmar.
Kiwei pat kiba shah kynnoh ki dei kiba donkti beit ha kaba pynbiang beaiñ ïa ki tiar bad ki kuli siat sha ki lehnoh. Ïa kane ka mukotduma la ujor ha ka ïingbishar ba kyrpang jong ka kynhun NIA ha Aizawl, kaba la pyni ïa ka jingkylla kaba khraw ha kane ka mukotduma.
