Imphal, Jymmang:
Kumba la ïathuh ka tyllong khubor, la ong ba ka la don bad mih biang ka jingïasiat kaba la jia ha ka shnong Ringui kaba don ha Ukhrul distrik, ha kaba ka la pynmynsaw ïa ki katto katne ngut ki nongtrei mon sngewbha jong ka shnong Naga ha ka step jong ka lah sngi U Blei. Kane ka jingjia ka la jia tang katto katne sngi hadien ba ki bor pahara ki la pynlong ïa ka jingïakynad hapdeng ka por ba dang jur ki jingïakynad ba dang ïai bteng ha Manipur.
Katkum ka jingïathuh jong ka Village Protection Committee (RVPC), ka jingsiat kaba thymmai ka la jia ha Ringui Horei Hills bad ha Hamsan ha ka por kumba 4:40 baje mynstep ha kaba ki kynhun lehnoh Kuki kaba hap hapoh ka Suspension of Operation (SoO) Pact ki la pynlong ïa ka jinghiar thma ïa ki nongap shnong Naga ha ka por ba ki dang leh ïa ki kam peitngor ba man ka sngi.
Ka Committee ka la ong ba ka jingsiat suloi ka dang bteng haduh ba la thoh ïa ka khubor.
Ha katei ka jingshah thombor, la ïathuh ba katto katne ngut ki nongap shnong Naga, ki la mynsaw na ka jingdei kuli. Hynrei ïa ka jingdon kiba mynsaw ym pat lah ban tip haduh ka por ba ai ïa kane ka kaiphod.
Da kaba pynrem jur ïa ki jingshah thombor ba man ka por khlem daw da ki kynhun lehnoh Kuki hapoh ka jingïateh kular SoO, ka Komiti ka la pynpaw ïa ka jingsngewkhia kaba jur halor ki khubor ba ki lehnoh Kuki kiba don tiar ïaleh kiba stad bha ki la buh ha ki jaka buh bun tylli ha ki lum Ringui Horei bad sawdong jong ki bad ha Hamsan, na kaba la ju leh beiñ ïa ki nongleh kam sniew.
Ka Committee ka la pynpaw ruh ba kine ki kam shyrkhei bad pyntieng kiba ju jia man ka por ki long ki bym lah shah satia bad ki long ka jingpynkheiñ kaba jur ïa ka burom, ka hok ban im bad ka jinglong trai hok jong ki paidbah ka shnong Ringui.
Ka RVPV ka la pynrem khlem jingartatien ïa kine ki kam thombor ba la leh ha ka khyndew jong ki bad ki briew jong ka, bad ka la maham ba ïa kine ki kam thombor ba ju jia man ka por yn ym kheiñ sting.
Kano kano ka jingthmu ban pynmynsaw shuh shuh ïa ki riew paidbah kiba lui-lui bad ban rung tuh ha ka khyndew jong ngi kan khot ïa ka thma kaba jur bad kaba khlem jingpynrem.
Ka Committee ka la khot shuh shuh ïa ki bor ba dei peit ba kin tohkit mardor ïa kane ka kam bad ban pynngat ïa ki nongleh kam sniew ha ka aiñ da kaba sdang ïa ki jingtohkit kiba donkam ban pynthikna ba kum kine ki jingjia yn ym ailad shuh ban jia biang.
Katkum ka kyrwoh ba la pyllait da ka Kuki CSO Working Committee la ong ba katei ka jingjia ka la jia ha ka por kumba 3 baje mynstep ha kaba ki riew kieng atiar ki la thmu ban rung sha ki jaka ba sah ki Kuki lyngba ka Tongou pocket jong ka Kampa Range.
Ka seng Kuki CSO WC ka la ong ba ka jingïasiat kaba markylliang ka la pynmynsaw jur ïa u nongïarap ka seng.
Ka komiti ka la kynnoh shuh shuh ba ki khubor kiba lah ban ngeit ki pyni ba ka NSCN (EF) ka la leit sha ki bor pahara ha Sinakeithei, da kaba kynnoh ba ka la pan por lai sngi ban ym tuklar. Kane ka pynmih ïa ka jingsngewkhia kaba jur shaphang ka jingkitkhlieh bad ka bynta jong ki bor pahara ha madan.
Wat hapdeng ki khubor ba ka jingkulmar ka la nang jur ha ka thaiñ lum, hynrei haduh mynta ym pat shym la pynmih kano kano ka jingpynbna kaba shai na ka sorkar jylla ha kaba ïadei bad ka jingsiat ba dang jia biang mynta ha ka shnong Ringui.
