Khliehriat, Nailur 10
Ka Moopyniein SCSO, Tuberkmai Shnong CSC bad Suchen Mulieh YWSC ki la khur jingjop ha ka jingïalehkai 3rd Division Football Tournament ba la pynïaid da ka East Jaiñtia Hills District Football Association (EJHDFA) ha madan Artificial Turf Deinshynrum, Khliehriat.
Ha ka jingïalehkai kaba la long ha ka 10 tarik Nailur ka Moopyniein SCSO ka la jop da 2-1 ïa ka Moonongtdu SC.
Ka Moonongtdu ka la ïoh ban pynkhih jar nyngkong ha ka minit kaba 11 lyngba u Paimi Nongtdu katba ka Moopyniein SCSO ka la pyntam da ar kol ha ka minit ba 19 ba la thep da u July Siangshai bad 80+1 ba la thep da u Damisooki Lamare.
Ha ka jingïalehkai kaba bud, Tuberkmai Shnong CSC ka la pynliem da 4-0 ïa ka Mutong SC. Ïa kine ki kol jong ka Tuberkmai shnong la thep da Laraikut Sana ha ka minit kaba 13 & 49, u Arnes Ryngkhlem ha ka minit kaba 14 bad u Kirat Phawa ha ka minit kaba 80.
Ha ka jingialehkai kaba khatduh jong kane ka sngi, ka Suchen Mulieh YWSC ka la pynliem da 3-2 ïa ka Lama Youth SSC.
Ki nongthep kol jong ka Suchen Mulieh ki long u Eugeneson Sumer uba la thep ha ka 13 & 67 min bad u Dominic Suchen ha ka 73 min.
Katba ki nongthep kol jong ka Lama Youth ki long u Banshan Dong ha ka minit ba 18 bad u Soowanki Suchen ha ka 79 minit.
