Shillong, Nailur 10
Ka kynhun ki rangïalehkai Under-17 jong ka Mynken Christian Higher Secondary School kan pynkhreh ban ïakhun final pyrshah ïa ka T.G English School kaba na Manipur ha ka Sngi Balang ha Dr. Ambedkar Stadium kaba ha ka nongbah Delhi.
Kane ka jingïakhun final jong ka lympung ïalehkai 63rd Subroto Cup International Football Tournament 2024 kan long ha ka por 2:30 janmiet bad ka Mynken ka donkam ban ïalehkai bha kumba ka la lah ban ïakhun ha ki jingïalehkai ba la dep khnang ba kan lah ban kynjoh sha ka thong jong ka jingjop.
Kumba ka paw ha ka jingïakhun semi final ka Mynken Christian ka la lah ban pynliem noh ïa ka Govt. Higher Secondary School kaba na Arunachal Pradesh haduh 7-0 kol bad u rang-ïalehkai ba kynsai jong kane ka kynhun u Banganson Nongphlang u la khur ïa ka hat-trick da kaba thep marwei haduh lai kol, u Alicestar u la thep ar kol, katba u Mebanlamlynti bad u Mebankhraw ki la ïoh ban thep mar shi kol.
Katba ka T.G English School na Manipur ka la lah ban pynliem ïa ka Sri Lanka Schools Football Association da 1-0 kol bad kane ka la wan lyngba u Heroba uba la thep ha ka minit kaba 27.
