Kohima, Nailur:
Kum ka jingai jubab halor ka jingsngewkhia kaba nang jur halor ka jingwan buhai shnong be-aiñ jong ki briew nabar, ki pulit jong ka Dimapur ki la pynjur ïa ka jingpeit bniah ha ki jaka rung kynthup jaka sangeh rel jong ka Dimapur.
Kine ki jingpyntreikam ki long kum shi bynta ban shim ïa ki sienjam bathymmai, kiba la sdang naduh ka 3tarik Nailur, ki thmu ban khang lad ïa ka jingwan tuid jong ki briew kiba la shah suba ba ki rung beaiñ sha Nagaland.
Ki pulit ki la khmih bniah bha ïa ki kot ki sla, kynthup ïa u Aadhar bad ki Voter ID Card, jong ki nongleit nongwan kiba poi da ka rel. Ki dang lum ruh ïa ki jingtip kiba bniah na palat 1,000 ngut ki ‘riewshimet kiba rung sha kane ka nongbah man ka sngi. Kiba bun na kine ki ‘riew shimet, ki leit sha ki thaiñ Lahorijan bad Golaghat jong ka Assam.
U Commissioner of Police u Kevithuto Sophie u la pynthikna ba la pynlong ïa ka jingkhynra baroh shisngi ha ki jaka rung bapher bapher kiba hapoh ki jylla. U la khot ïa ki paidbah bad ki sengbhalang ban pyntip ei ei ïoh lehse don ki briew kiba ki suba sniew da kaba pynjur ïa ki jingkhmih bniah ban khanglad ïa ka jingrung beaiñ jong ki briew nabar.
