Shillong, Nailur 12
Ar ngut ki rangïalehkai ka Jylla u Ricky John Shabong bad u Samuel Kynshi Lyngdoh kin mihkhmat ïa ka Punjab FC ha ka lympung ïalehkai Indian Super League (ISL) mynta ka aïom ka ban sdang naduh ka Sngi Thohdieng.
Kane ka la wan hadien ba ka Punjab (kaba la kiew kyrdan ha u snem ba la dep) ka la pynbna ïa ki kyrteng jong 26 ngut ki rangïalehkai ki ban mihkhmat ïa kane ka klob ha katei ka lympung. Kumta kane ka kynhun kan pynkhreh ïa ka jingïalehkai kaba nyngkong eh jong kane ka lympung pyrshah ïa ka Kerala Blasters ha ka 15 tarik ha Kochi bad kan pynkhreh ruh ïa ka jingïalehkai kaba nyngkong eh ha la ïing ha ka 20 tarik mynta u bnai pyrshah ïa ka Odisha FC ha Jawaharlal Nehru Stadium kaba ha New Delhi.
Kumba ka paw kitei ar ngut ki rangïalehkai shapdeng ka Jylla ki la pynïasoh sha katei ka klob naduh mynshem snem ha kaba ki la ïoh ban ïalehkai na katei ka klob ka aïom ba la dep. U Samuel u la ïalehkai khatduh eh na ka Real Kashmir FC ha ka lympung ïalehkai I-League 2022-23, katba u Ricky u la ïalehkai khatduh na ka Rajasthan United hadien ba la shim wai ïa u na ka Mohun Bagan ha u 2022.
Na ka bynta katei ka lympung ïalehkai, na ka liang u coach kane ka kynhun u Panagiotis Dilmperis u la jied ïa ka kynhun kaba kynthup lang ïa kiba dang khynnah bad kumjuh ïa kiba la ju mlien ban ïashim bynta ha kane ka lympung. Kiwei pat ki rangïalehkai nabar ri ki kynthup ïa u Luka Majcen, Mushaga Bakenga, Ezequiel Vidal, Ivan Novoselec, Asmir Suljic bad u Filip Mrzljak. Katba kiwei pat ki rangïalehkai ka ri kiba dangdep soi thymmai ki long u Vinit Rai, Ninthoinganba Meetei, Muheet Shabir, Nihal Sudeesh (on loan) bad u Likmabam Rakesh Singh (on loan). U Mohammed Suhail F. bad u Shami Singamayum ki dei kiba la mih lyngba ka shlem ai jinghikai jong kane ka klob bad la kyntiew kyrdan ïa ki sha ka kynhun ba la san (senior) ryngkat lang u Tekcham Abhishek Singh, Manglenthang Kipgen bad u Ayush Deshwal.
