Shillong, Nailur 15
Ka West Jaiñtia District Sports Association ka la lah ban pynthikna ban bat ïa ka kyrdan ba hakhlieh ha baroh ar tylli ki kyrdan ïalehkai U-14 bad U-16 jong ka Zone-B ha ka Meghalaya Youth League 2024 hadien ki jingïalehkai kaba la long ha ka sngi Saitjaiñ.
Ïa kane ka lympung la pynlong da ka Meghalaya Football Association ha ryngkat ka jingkyrshan da ka tnat ïalehkai jong ka Sorkar Jylla.
Da kaba donkam ban kiar na ka jingshah rem ha ka Amlarem Block Sports Association kaba wan ba-ar, ka West Jaiñtia ka la jop da 4-0 kol ha ka U-14 bad nangta ka la ïakhaid noh da 1-1 kol ha ka U-16. U Kaisarmi Dkhar u la ïoh biang sa kawei ka hat-trick na ka bynta ka WJDSA.
Kumta ka West Jaiñtia mynta ka la kamai 21 point bad tam ïa ka Amlarem kaba la wan ba-ar (13 point) ha ka U-14 bad 17 point ha ka U-16.
Ha kawei pat ka liang, ka Laskeiñ Block Sports Association ka la ïakhun ïa ka jingïalehkai ba khadduh jong kane ka lympung bad ka la ïakhaid mar 2-2 kol bad ka East Jaiñtia District Football Association ha ka U-14. Hadien kata ka East Jaiñtia ka la jop da 1-0 kol ha ka U-16.
Ha ka Zone-C, ka Ri-Bhoi District Sports Association ka la lah ban pynjemkhnap ïa ka Sohra Sports Association ha la ïing haduh 5-0 kol ha ka U-14 bad 10-0 kol ha ka U-16. U Iaisynroplang Syiemlieh bad u Me-u-ba-ai Sumer ki la khur ïa ki hat-trick ha kine ki jingïakhun.
Ha kawei pat ka jingïakhun jong ka U-16 jong kane ka zone Shil-long Sports Association ka la pynliem noh ïa ka Western Ri-Bhoi Association da 4-0 kol. Kumta ka RBDSA ka danglong ka kynhun kaba danglam-khmat ha baroh ar tylli ki kyrdan, katba ka SSA ka la wan ba-ar.
Ka Zone-D, ka Nongstoiñ District Sports Association ka la lah ban pynliem noh ïa ka Mawshynrut Sports Association da 5-0 kol ha ka kyrdan U-14 bad 4-0 kol ha ka U-16. U Ronifield Dkhar Rit u la lah ban ïalehkai bha ha kane ka jingïakhun.
Ka Pyndengumïong District Sports Association ka la lah ban pynliem ïa ka Mawkyrwat District Sports Association da 1-0 kol ha baroh ar tylli ki kyrdan ïalehkai ha kaba ka la wan ba-ar ha ka U-14 (20 point) bad balai ha ka U-16 (13 point).
Kiwei pat ki ar tylli ki kynhun kiba ïalehkai ki long ka Eastern Border Sports Association bad ka Tyrsad Area Sports Association. Ka EBSA ka la jop da 2-0 kol, hynrei ka jingïalehkai U-16 ka la ïakhaid mar 2-2 kol.
Ka Nongstoiñ ka la ïoh ban lamkhmat ha baroh ar tylli ki kyrdan ïalehkai, ha kaba ka Pyndengumïong ka wan ba-ar ha ka U-14 bad ka Eastern Border ka wan ba-ar ha ka U-16.
Ki ar tylli ki kynhun kiba la wan ha ki kyrdan ba hakhlieh kin rung sha ka quarter final ka ban sa long ha u bnai ban wan. Ïa ka Zone-A ha Garo Hills la lah ban pyndep ïa baroh ki jingïalehkai.
