Jerusalem, Nailur:
U Myntri Rangbahduh jong ka Israel- u Benjamin Netanyahu, ha kane ka por u la pynbna ia ka jingpynkhreh jong ka Israel ia ki thong ba thymmai jong ka thma ka Israel ha Gaza ki ban kynthup ruh ia ka jingpynpoi iing biang ia ki nongshong shnong jong ka thaiñ Shatei Lam Mihngi kiba phet krad na ka jingshah siat sha shiliang pud ha ka jingiakynad jong ka Israel bad ka Hezbollah, kaba long ka paralok jong ka kynhun lehnoh Hamas.
Kumta, ha katei ka sngi, u Netanyahu u la pynpaw ba ka kynhun Myntri jong ka saiñ pyrthei-pahara ka la pynthymmai ïa ki thong jong ka thma ba kan pyntreikam nangne sha khmat ki ban kynthup ïa kine ki bynta harum: ka jingwanphai biang jong ki nongshong shnong jong ka thaiñ Shatei Lam Mihngi sha la ki ïing ki sem da kaba suk bad kumjuh ruh ka jingpyllait noh ia ki nongshah rahbor na ka kti ki lehnoh Hamas. Ki shipai Israel bad ka kynhun lehnoh jong ka Lebanon kaba la kyrshan da ka Iran, ki la iather bom markylliang la jan man ka sngi, naduh ba sdang ka jing-leit hiar thma jong ka Hamas ha ka 7 tarik u Risaw, kaba la wanrah ïa ka thma kaba la neh mynta la jan shi snem hapoh ka nongbah Gaza Strip jong ka Palestine.
Hynrei, ka kynhun lehnoh Hezbollah jong ka Lebanon, ka la ong ba katei ka jingleit thombor jongka ia ka Israel, ka long kum shi bynta ban ai jingkyrshan ia ka paralok jongka na Palestine, ka Hamas.
Ki heh jong ka Hezbollah, ki la ong ba katei ka kynhun kan sangeh noh ia ki jingiakynad bad ka Israel, lada lah ban iapynbeit ia ka jingsangeh iasiat ha Gaza, katba na ka liang jong ka Israel pat ka la ban jur ba kan nym ailad da lei-lei ruh ia kitei ki kynhun lehnoh ba kin don ha katei ka jaka khappud, kaba don sha ka phang Shathie jong ka ri Lebanon.
Katei ka jingiakynad hapdeng ka Israel bad ki lehnoh Hezbollah jong la Lebanon, ka la shim da ki spah ngut ki dkhot jong katei ka kynhun lehnoh jong ka Lebanon bad kumjuh ruh ka Israel ka la duh da ki phew ngut mynsiem ba lui-lui bad ki shipai na ka liang jong ka Israel.
Kumta, kane ka jingïakhun ka la pynlong ruh ïa ki phew hajar ngut ki paidbah nongshong shnong na baroh arliang ki ri ban phet krad na la ki jong ki ïing ki sem bad poi sakma na shiliang sha shiliang khappud tang ba kin lait im na ki kuli bad ki bom jong ki shipai Israel bad ki lehnoh ka Lebanon.
