Yemen, Risaw:
Ki lehnoh Houthi, kiba ioh jingkyrshan na ka Iran, ha ka Sngi Nyngkong ki la pynbna ba ki la ioh ban thombor ïa ka Kad Liengsuiñ kaba don hapoh Riyadh, kumjuh ruh ïa ka karkhana pynkhuid umphniang kaba don ha Aramco bad kiwei de ki jaka ba kongsan kiba hap hapoh u pud- u sam jong ka Saudi Arabia. Kane ka long hadien ba ka Saudi bad ka Yemen, ki la pynbna ba ki la ioh ban pynjulor ïa katto- katne ki thong ba kongsan jong ka Houthi ha ki thaiñ rud duriaw Red Sea.
Ha kajuh ka por, la ong ba ka Pakistan bad ka Turkey ki la kular ban phah ïa ki shipai sha Saudi Arabia hapoh ka jingïateh ba thymmai ban ïada mar kylliang hadien ki taiew jong ka jinghiar thma jong ki Houthi, katba ka Riyadh bad ki paralok sorkar Yemen jong ka ki la sdang ïa ka jingpynbor kaba thmu ban shim biang ïa baroh ki jaka ba la bat da kane ka kynhun.
Ki shipai Yemen ki la ong ba ki la pynlong palat ïa ka 1000 tylli ki jinghiar thma bad sdang ïa ka jinghiar thma pyrshah ïa ka nongbah Sanaa ba la bat da ki Houthi, katba ka kynhun synrop ba la ïalam da ka Saudi kaba kyrshan ïa ka sorkar ba la ithuh da ka pyrthei ka la ong ba 100 tylli ki liengsuiñ thma ki her shabar ha ka por mynstep.
U Turki Al-Malki, uba dei u nongaiktien jong ka kynhun synrop ba la ïalam da ka Saudi, u la ong ha ka X ba ki shipai duriaw jong ka ki la siat ïa ki “thmu shipai” kiba dei jong ki Houthi ha Hodeida ha rud duriaw Red Sea.
Ki la “pynjot ïa ki jaka buh tiar, ki jaka buh ïa ki lieng ba la shah teh ha ki booby bad ki mawshun jong ki shipai duriaw” bad ki la “pynthut ïa ka jinghiar thma ba la thmu” kaba thmu ïa ki lynti um ha ka Duriaw Basaw ba shathie, u la ong.
Ki jingbthei kiba jam ki la pynkhihwin ïa ka Riyadh ha ka janmiet jong ka sngi Nyngkong katba ka jingialeh ka nang jur, bad u nongaiktien jong ki Houthi u la iathuh ba katei ka kynhun ka la ther ïa ka kad liengsuin King Khalid International jong ka nongbah Saudi bad kumjuh ruh ïa ka karkhana pynkhuid umphniang jong ka Aramco bad kiwei kiwei ki jaka ha ki bynta ba shathie jong katei ka hima.
Ka sorkar ka la pynbna ha ka sngi U Blei ïa ka thong ba jrong ban shim biang ïa baroh ki jaka jong ki Houthi sha ka ïing jong kiba bun ki nongshong shnong jong ka Yemen, bad bun na ki la bat la palat shisnem.
Ha u bnai ba la lah, ka kynhun ba la kyrshan da ka Iran, ka la kurup ïa ki jaka ba heh ha ki rud duriaw harud ka Duriaw Basaw bad ka Bab al-Mandab Strait, kaba dei ka jaka khanglad ïa ka jingshalan umphniang bad kit mar, ha ka jingïaleh kaba la pyniap briew tam ha Yemen ha kine ki snem.
Ki Houthi ki la hiar thma ruh ïa ka ri ba marjan jong ka Saudi Arabia naduh ba ka thma pohïing ha Yemen ka la khie biang sha ka jingim, bad ki la pynbna ïa ka jingkhang ïa ki jhad jong ka ha duriaw.
Ha ka sngi Nyngkong, ki nongmihkhmat jong ka Saudi Arabia, Pakistan bad Turkey ki la pynlong ïa ka jingïalang kyrkieh ha Riyadh hapoh ka jingïateh kular ïada ri kaba la ïasoi lang ha u Naiwieng ha kaba la kular ïa ki ban ïarap iwei ïa iwei pat lada jia ba don kano kano ka jingshah thombor.
