Yemen, Risaw:
Ki shipai jong ka kynhun synrop ba la ialam da ka Saudi Arabia kiba leit hiar thma sha Yemen ki la ioh ban knieh biang ïa ki katto- katne ki bynta ba kongsan kiba don sawdong jong ka Bab el-Mandeb Strait bad kiba la ha hapoh ka kti jingsynshar jong ki lehnoh Houthi ba la ai jingkyrshan da ka Iran baroh shi katta.
Ki heh sorkar ki la iathuh ba ki shipai kiba ïatreilang bad ka sorkar ba la ithuh da ka pyrthei, ki la ioh knieh biang noh ïa ka nongbah kaba kongsan jong ka Dhubab kaba don sha ka phang Shathie jong ka duriaw bah. Ki nalor kata, ki la ioh ruh ban kurup noh ïa ka shnong Bab bad Hadeid, la ong ki heh sorkar, kiba la kren khlem da kwah ban pynpaw kyrteng namar ba kim shym la shah ban kren bad ki nongthoh khubor. Ki nongsakhi ki la iathuh ba ki la iohi ïa ki tank sorkar bad ki shipai kiba rung shapoh ki sor.
Ka jingpynbor jong ka sorkar ka la wan kum shi bynta jong ka jinghiar thma kaba jur kaba la sdang ha ka step jong ka Sngi Nyngkong hapoh ka jingtap suinbneng da ka kynhun shipai Saudi.
U Secretary jong ka U.S., u Marco Rubio, u iathuh ha ki nongthohkhubor, ba la khmih lynti, ba ka sorkar, kaba la kyrshan da ka Saudi Arabia ha Yemen, kan sa thombor biang ïa ki lehnoh, na ka bynta ban ioh biang ïa ki jaka jong ki. Haba la kylli hato ka kynhun synrop ba la ïalam da ka Saudi Arabia ka la ïatreilang ïa kane ka kam bad ka America, u Rubio u la ong ba ka Saudi Arabia bad ka U.S. ki don ïa ka jingïateh kular ban ïada hynrei un nym ai shuh ïa ki jingtip ba kham bniah.
Ka sorkar Yemen ka la shah beh noh na ki katto katne ki jaka jongka da ka jingïakhih jong ki Houthi bad ki Saudi ki la shah thombor bad “ki don ka hok ban ïada ïalade,” ong u Rubio.
Ka U.S., ka la ai jingkyrshan ïa ka Saudi Arabia, ha ka jingïakhun jong ka, kaba dang ïaid shakhmat, pyrshah ïa ki Houthi, katkum ka jingïathuh jong uwei u heh jong ka thaiñ bad uwei u heh jong ka U.S. Kane ka jingkyrshan jong ka U.S. ka kynthup ïa ka jingïasam jingtip, ka jingithuh ïa ki thong bad ka jingthmu na ka bynta ka jingshah thombor, la ong ki heh sorkar, kiba la kren khlem da kwah ban pynpaw kyrteng namar ba kim shym la shah ban kren bad ki nongthoh khubor.
Ka U.S., ka la kyrshan ïa ka kynhun synrop, ba la ialam da ka Saudi Arabia, kaba ialeh pyrshah ïa ki Houthi, ha kaba sdang jong ka thma Yemen, shwa ba kan iehnoh ïa katei ka kynhun synrop, ha kine ki snem ba ladep.
Kane ka jinghiar thma ka la jia tang hadien ba ki lehnoh ki la ong ba ki la ïoh ban kurup kham bun ki jaka ha ka bynta ba shathie lam mihngi jong ka Yemen, da kaba shim ïa ka nongbah kaba kongsan ha ka jingshah pynshitom beiñ ïa ki shipai ba la kyrshan da ka Saudi katba ki dang ïaid shaphrang sha ka nongbah jong ka jylla kaba kongsan ha katei ka thaiñ.
U nongaiktien jong ka kynhun synrop ba la ïalam da ka Saudi, u Maj. Gen. Turki al-Malki, u ong ba ki 100 tylli ki liengsuiñ ïapom, ki ai jingkyrshan ïa ki bor jong ka sorkar Yemen, kaba la ithuh da ka pyrthei, kaba ïakhun pyrshah ïa ki Houthis. U la ong ba ka kynhun synrop ka la ïoh ïa ka “jingïada na suiñ” jong ka Bab el-Mandeb Strait kaba donkam bha bad ka la pynjot ïa ki spah tylli ki thong jong ki Houthi kum shi bynta jong ka jingïakhih kaba dang ïaid shakhmat.
Ki lehnoh Houthi, ki la kurup ïa ka nongbah Turbah, ha ka Sngi U Blei, tang khyndiat por shwa ba ka sorkar, kaba la ithuh da ka pyrthei, kan pynbna ïa ka jinghiar thma kaba heh pyrshah ïa ki.
