Tehran, Nailur:
U President ba thymmai jong ka Iran, U Masoud Pezeshkian, ha kane ka por u la kular ba un pynthikna ba ki pulit ka Iran kin ym pynshitom beiñ ne leh donbor shuh ia ki kynthei nangne shakhmat. Ia kane u la kren ha ka sngi kaba u ai jingkren sha ki lad pathai khubor kaba dei ruh ka lyngkhuh sngi iap ar snem jong ka samla Mahsa Amini kaba la khlad noh ha ka kti jong ki pulit ha thanat ha ki 2 snem ba la leit.
Ka Amini, ka long ka nong Kurd na Iran, kaba dang 22 snem ka rta, hynrei kaba la duh ei noh ia ka jingim ha ka kti jong ki pulit ha ka 16 tarik u Nailur 2022 tang katto-katne sngi hadien ba ki pulit jong ka Iran ki la kem ïa ka na ka nongbah Tehran halor ka jingkynnoh ba katei ka samla ka la pynkheiñ ïa ka aiñ riam kaba pyrkhing jong ka ri Islam na ka bynta ki kynthei ha kaba la ong ba ki kynthei ki dei ban kup jaiñ ia ka khlieh haba ki mih sha ki jaka paidbah.
Kumta, la ong ba ka jingiap jong katei ka khynnah- samla ha utei u snem, ka la wanrah ia ki jingiakhih paidbah ba jur kiba la neh da ki bnai ha kylleng jong ka ri Iran, ha kaba da ki spah ngut ki briew, kynthup da ki phew ngut ki bor pahara, ki la iap ha katei ka jingkulmar bad kumjuh ruh da ki hajar ngut ki nongiakhih ki la shah kem.
Namarkata utei u nongialam ba thymmai jong ka Iran ha kane ka por, u la pypaw ka jingsngewkhia bad jingsngewsih kaba jur haba iadei bad katei ka jingiap jong ka samla Amini ha kitei ki snem ba la leit bad ha kane ka kynti, u la kular ba ka Iran kan nym aibor shuh ia ki pulit ba kin leh donbor ne pyni bor ia ki kynthei hapoh ka ri.
U Pezeshkian u la mih bujli kum u President ka Iran, ha ka jaka jong u President barim ka Iran- u Ebrahim Raisi uba la khlad noh ha ka jingleit hap bakla ka liengsuiñ kaba u shong ha u bnai Jymmang.
Kumta, la ong ba ha ki por ilekshon kiba u la ai jingkren sha ki paidbah jong ka ri, u Pezeshkian u la kular ia ki paidbah bad khamtam eh ia ki kynthei, ba un nym ailad shuh ia ki bor ka aiñ lane ki pulit ba kin thombor ne knieh ia ka hok jong ki kynthei, khamtam haba iadei bad ka jingpyrkhing ba ki kynthei ki mad haduh kine ki sngi ba ki hap ban kup jaiñ ‘hijab’ ia ka khlieh jongki shisien ba ki mih sha ki jaka paidbah.
La ong ruh ba utei u nongialam ha katei ka por ialap ilekshon, u la pyntikna ruh ba un ialeh ban pyllait noh ia ki jingpyrkhing haba iadei bad ka ‘Internet’ namar ka Iran ha kine ki snem ba la leit naduh ba la jia katei ka jingiakhih paidbah ha kylleng jong katei ka ri naduh u snem 2019 halor ka jingkiew dor jong ka umphniang bad khamtam eh hadien ki jingiakhih paidbah namar ka jingiap jong ka samla Amini, ka la pyrkhing noh ia ka rukom pyndonkam internet bad haduh kine ki sngi ruh ka internet ha katei ka ri kam pat shym la treikam pura.
Namarkata, ha kane ka por, utei u nongialam ba thymmai jong ka Iran, u la pyntip sha ki paidbah ba ka sorkar jong u, ka dang ialeh shitom ban weng noh ia kitei ki jingpyrkhing baroh kiba la ktah jur ia ki paidbah baroh shi katta ki snem ba la leit bad u la kular ruh ba ka sorkar jong u, kan ai ka jingshakri kaba bha tam naka bynta ki paidbah nongshong shnong jong ka ri nangne shakhmat.
