France, Jylliew:
Ha kane ka khubor, la ong ba ki pulit bad ki bor ka aiñ jong ka France, ki la ioh ia shibun tylli ki jing ujor halor ka jingiadung tari, ka jingiashoh- pynmynsaw bad wat ka jingiatuh- iathiem bad wat ki kam leh bor ia ki kynthei, haiden ka jinglehkmen ba shisien shi snem lane ka ‘Annual Fete’ ba la pynlong da katei ka ri, ha kaba 243 ngut ki la shah kem hadien jong katei ka jingjia. La ong ba palat 2 million ngut ki paidbah, ki la leit ban tuid sha katei ka tamasa ‘Open Air Music Festival’ kaba ki ju pynlong ha ka nongbah Paris shisien shi snem, ha kaba da ki hajar ngut ki nong Britain bad ki nong Ireland ruh ki ju leit poi sha katei ka tamasa man la u snem. Watla katta, la ong ba ka la mih ka jingkulmar hapdeng katei ka jingialeh kmen bad la iohi ba ki paidbah kiba iadon ha katei ka jaka, ki la poi shaduh u pud jong ka jingpyrshang ban ia pyni bor bad pyniap ruh katba lah.
Ha Paris, ka jingkulmar kaba nyngkong ka la mih hadien ka por 11:00 PM ha ka jaka jong ka Chatelet kaba don hajan ka Notre Dame Cathedral, ha kaba ka jingkhapngiah palat ka la ailad ia ki kynhun ki samla shynrang ban sdang ia ka jingialeh bad shoh ia ki nongpeit kai. Hadien kane ki pulit ki la pyndonkam da ka lyer pynsat khmat ban pyniaid ia ki paidbah ha ka St Germain de Pres. La kem haduh 148 ngut tang ha ka nongbah, ha kaba ki kynhun runar, ki la pynpra ia ki jingkhang jong ki kali, ki la pynjulor ia ki kali, bad ki la pyrshang ban rung tuh shapoh ki dukan. Ka jingeh kaba khraw ha kane ka jingïalang ka long ka jingshah thombor ïa ki kynthei. Ki pulit ki la ioh palat shiphew tylli ki khubor ba ki kynthei ki la shah injek da ki syringe kiba don ia ki jingbam bym lah ban tip, kaba dei ka jingjia kaba ju jia biang naduh ka tamasa jong u snem ba la dep.
Kawei ka samla ka la shah batbor ha kawei ka iing sah shimet ha Paris hadien ba ka la shah injek, katba kawei ka khynnah kynthei kaba dang 15 snem ka rta ka la iathuh ba ka la shah batbor ha ki jaka ba marjan jong ka Nogent-sur-Marne. Ha kawei pat ka jaka, ha Gagny, la kem ia uwei u briew uba 48 snem ka rta, uba la leh beijot ia kawei ka khynnah kynthei kaba dang 12 snem ka rta.
Ka jingleh donbor ka la saphriang sha kiwei pat ki bynta jong ka ri France ruh kumjuh. Ka Daily Mail, ka iathuh ba ha ka thain shatei lam mihngi, uwei u rangbah, 40 snem ka rta, u la shah dung tari ha Toulouse bad kumjuh ruh kawei pat ka briew, 40 snem ka rta, ka la shah dung tari hi kumjuh hapoh Colomiers, kaba don hajan jong katei hi ka nongbah. Baroh arngut ki la lait na ki jingma kiba khraw kiba ap ia ka jingim jongki hadien ba ki la ioh ia ka jingsumar ba kyrkieh na ka hospital ba la pynkit ia ki.
Ka jingshah thombor ka la jia watla la pynjari haduh 5,000 ngut ki pulit bad ki gendarme, kiba la bthah ban kiar na kaba pynjur ia ka jingiakynad bad ban tuklar tang haba donkam eh. Ka dei ruh hadien ka jingkulmar ba dang shen ha kane ka nongbah hadien ba ka Paris St Germain ka la jop ïa ka final jong ka European Champions League, ka jingïakhun kaba la pynlong ïa arngut kiba ïap jyllop ha um.
Ki jingkynthoh halor ki jingjia ki la paw ha ki social media, ha kaba bun ki nongpyndonkam ki la sam ïa ki video ba ïanujor kiba pyni kumno ka tamasa ka long ha ki snem 1990 pyrshah ïa mynta.
Katba ki heh jong ka Paris ki la thaw ïa ki jaka ba la khang pyrshah na ka bynta ki kynthei bad ki nongwan jngohkai kiba duna dkhot met hadien ka jingshah lehbeiñ ha ka liang ka jingïadei kaba jur bha ha u snem 2025, ki lad jingïada kim shym la pynsangeh ïa ka jingpang kaba la saphriang kylleng.
