Tehran, Jylliew:
Ka Iran ha kane ka kynti, ka la kyntait ïa ka jingkren jong u Vice-President ka US, u JD Vance, ba ka Iran ka la mynjur ban ailad ïa ki nongpeit bniah jong ka tnat pule ïa ki kam ‘Nuclear’ ba kin leit rung bad peit bniah ïa ki jinglong- jingman jong ki kam ‘Nuclear’ hapoh Iran, ha kaba u Myntri ka tnat kam bar ri jong ka Iran, u Esmaeil Baqaei, u la ong ba ka Iran kam shym la ïa mynjur eiei halor kane bad u la ong ruh ba ka jingiatreikam hapdeng ka Iran bad ka International Atomic Energy Agency (IAEA) kan long ha ka rukom ba pyrkhing bha lada ka donkam ban leh shisha ïa kata.
Haba iakren bad ki nongthoh khubor jong ka tnat pathai khubor ka Iran, ka IRNA, ha ka sngi Nyngkong, hadien ka jingiakren jong ka US bad Iran, kaba dang shen kaba la long ha Switzerland, U Baqaei, u la jubab halor ka jingkren jong U Vance, da kaba ong ba ka jingiatreilang bad ka tnat Nuclear jong ka United Nations, kan long katkum ka jingiakut ban ym ktah eiei ïa ki kam bad ka hok jong ka Iran, hapdeng ka Iran bad ka IAEA.
“Ka jingïadei jong ka Iran bad ka Agency, katkum ki jingkitkhlieh jong ka Iran katkum ki jingïateh kular ban ïada, kan ïai bteng katkum ki rukom treikam ba la don lypa bad ban bud ryntih ïa ki aiñ ba la pynjari da ka Islamic Consultative Assembly bad ki rai jong ka Supreme National Security Council (SNSC),” ong u Baqaei ha ka IRNA.
Kane ka jingkren jong u ka long hadien ba u Vance, hadien ka jingïakren, u la kam ba ka Iran, ka la mynjur ban ailad ïa ki nongpeitkai nuclear, ba kin rung sha kane ka ri, kum shi bynta jong ka jingkiew shaphrang, kaba la ïoh ha ka por ba ïakren hapdeng ka Washington bad ka Tehran.
Ha ka jingkren sha ki nongthoh khubor ha Burgenstock resort ha Switzerland ha ka sngi Nyngkong, u Vice President jong ka US u la batai ïa ka sngi ba nyngkong jong ka jingïakren kum kaba “bha shibun eh” bad ong ba ki jingïakren ki la buh ïa ka nongrim na ka bynta ka jingïateh kular kaba lah ban long.
U Vance u la pynpaw ruh ba ka Iran ka ailad ïa ki nongpeit ïa ki tiar nuclear ban rung shapoh ka ri bad u la ong ba yn pynkhlaiñ ïa ki rukom jurip ban pynthikna ba ka Tehran kam lah ban shna ïa ki tiar nuclear.
Ka jingiakren ha Switzerland ka long ban weng ïa ki jingeh kiba la slem bha hapdeng kine ki ar tylli ki ri, kynthup ïa ka prokram nuclear jong ka Iran, ki kam pynriewspah ïa u uranium bad ki jingeh kiba kham heh ha ka thain.
Hynrei katkum ki tyllong khubor kiba tip bha ïa ki jingïakren ba la kdew da ka IRNA, ka Iran kam shym la ïashim bynta ha ki jingïakren kiba ïadei bad ka prokram nuclear jong ka ha ka por ba ïakren bad kam shym la mynjur ïa kino kino ki jingkular ba thymmai.
Ki tyllong khubor ki la ong shuh shuh ba kino kino ki jingïakren nuclear ha ki por ban wan hapoh ka jingïateh kular kaba 14 mat, kaba thmu ban pynbeit ïa ka jingïakynad hapdeng ka Iran bad ka America ha West Asia, kan shong ha ka jingpyntreikam ïa ka Paragraph 13 jong ka jingïateh kular.
Ki jingthoh kiba ïapher na Washington bad Tehran ki pynpaw ïa ki jingeh kiba dang sah katba baroh arliang ki pyrshang ban pynïaid shakhmat ïa ki jingpyrshang jong ki jingïadei bad ban poi sha ka jingsngewthuh kaba kham jylliew halor ki mat nuclear bad jingïada kiba ïakynad.
