London, Jylliew:
Katkum ki khubor, la ong ba u Myntri Rangbahduh ka UK, u Keir Starmer, u la mad ïa ka jingshah pynbor kaba jur ba u hap ban hiar shuki noh khlem da pynslem hadien ki jingiakynad bad u nongialam ka Labour Party, u Andy Burham.
Watla u Starmer u la kular ïa ki paidbah ban neh ha katei ka shuki, hynrei ka jingpynbor ka la nang jur katba nang bun ki paralok jong ka Labour Party kiba pynkut nia ba ka por jong u ka la kut. Ka jingkhmih lynti ka nang kiew ba un pynbna ïa ka por ban risaiñ noh mardor ha ka sngi Nyngkong. Ka dei ka sngi ba U Burnham un bam smai kum u nongthaw ain ha ka ïing dorbar thawain hadien ba u la jop ïa ka ilekshon ba kyrpang ha ka taiew ba la dep.
U myntri kam khaii, u Peter Kyle, u la ong ha ka sngi U Blei ba u Starmer u “pynlut por ban pyrkhat ïa ki jingshisha ha ka sain pyrthei, ki jingeh bad ki lad ki lynti kiba u shem ïa lade.”
“Nga tip ba u dei u myntri rangbahduh uba ju buh ïa la ka ri ha khmat eh”, la ong u Kyle ha ka BBC, watla u la ong ba ki khubor ba u Starmer un risain ki dei ki “kynnoh lyndet”.
U Starmer, u pynlut ïa ka sngi kut taiew ha Chequers, ka ïing heh jong ka ri, kaba ki myntri rangbahduh ki pyndonkam, ryngkat bad ka ïing ka sem jongu. Um shym la ai kano kano ka jingpyntip paidbah halor ka rai jongu, hynrei u la phah khubor ha ka social media ha ka Father’s Day.
“Ka jinglong kpa ka dei ka jingkmen kaba khraw tam jong nga. Mynta ka sngi, nga pyrkhat shaphang u kpa jongnga, bad u kpa uba nga long sha ki khun jongnga namar jong u,” u la thoh ha ka rynsan ‘X’ kaba ju tip mynshwa kum ka ‘Twitter’.
U President jong ka US, u Donald Trump, u la shim khia wat shwa ban pynbna, da kaba pyniadei ïa ka jingmih noh jong u Starmer bad ar tylli ki jingeh kiba u ju jia man ka por: ka jingwan buhai shnong bad ka bor ding ba lah ban pynthymmai.
“U Keir Starmer un iehnoh ïa ka kam kum u Myntri Rangbahduh jong ka ri United Kingdom. U la rem bha ha ki ar tylli ki sobjek kiba kongsan bha- KA JINGPYNBNA BAD KA BOR (PLIE IA KA UMPHNIANG HA DURIAW BAROH!).
Ym shym la lah ban tip la u Trump u jubab ne em ïa ki khubor ba la pynmih da ki lad pathai khubor halor ki jingthmu jong u Starmer. Ki arngut ki nongialam kim shym la kren ha ka taiew ba kut.
Ka jingïadei kaba jan jong u Starmer ha kaba sdang bad u president ka la nang sniew ha kine ki bnai ba la dep halor ki mat kiba kynthup ïa ka thma Iran, kaba ka UK kam shym la ïashim bynta.
Lada u Starmer u iehnoh ïa ka kam, un dei u myntri rangbahduh uba hynriew ban iehnoh ïa ka kam ha kine ki 10 snem ba la dep, kaba long ka jingkylla kaba khraw ha ka ri Bilat.
Ka jingbym sngewhun ïa u myntri rangbahduh ka la nang kiew la bun bnai, ha kaba ki nongthaw ain jong ka seng Labour ki la thrang ban pynphai biang ïa ka jinghiar ka jingshai jong ka sorkar naduh ba u Starmer u la ialam ïa ka seng pdeng sha ka jingjop ilekshon ha u Naitung 2024.
U la ïaleh ban pynurlong ïa ka roi ka par kaba la kular, ban maramot ïa ki jingshakri paidbah kiba la jot bad ban pynsuk ïa ka jinglut jingsep, bad u la shah pynthut ha ki jingbakla ba la ju jia man ka por, kynthup ïa ka rai jong u ban thung ïa u Peter Mandelson, u paralok jong u Jeffrey Epstein, kum u nongmihkhmat jong ka UK sha America.
Ka Labor ka duh noh ïa ki nongthep vote kiba laitluid sha ka Green Party kaba nang kiew bad ka ïakynduh ïa ka Reform UK kaba nang kiew, ka seng pyrshah ïa ka jingwan buhai shnong ba la ïalam da u Nigel Farage kaba ju ïalam ha ki jingthep vote ha ka ri baroh kawei.
U Burnham, haduh kane ka taiew u nongmihkhmat ba pawnam jong ka Greater Manchester, u la jop da kaba kut jingmut ïa ka shuki jong ka Makerfield kaba don ha ka thaiñ shatei lam mihngi jong ka ri England ha ka ilekshon ba kyrpang kaba la long ha ka sngi Thohdieng. U la ioh haduh 55 percent na ki 45,510 tylli ki vote, kaba kham bun palat 9,000 tylli ban ïa u nongjop ba ar jong ka Reform UK.
Mynta ba u Burnham u la kylla long u nongthaw aiñ, u don ha ka kyrdan ban ïakhun pyrshah ïa u Starmer na ka bynta ka jinglong nongïalam jong ka seng Labour. Ka jingkren pdiang jong u Burnham kam shym la iehnoh ïa ka jingartatien ba u kwah ban ialam ïa ka seng bad ïa ka ri.
“Baroh ki tip ba ka sain pyrthei kam treikam,” u la ong. “Baroh ki lah ban sngew ba ka ri kam don ha ka jaka ba ka dei ban don. Mynta ka miet ka lah, tang ka lah, ban long ka jingkylla.”
Ym pat lah ban tip la u Burnham un iakynduh ïa ka jingshah pynkup burom ne ka jingshah tynjuh, lada u Starmer un kynriah noh. U Bah Wes Streeting, uba la iehnoh ïa ka kam jong u myntri ka tnat ka koit ka khiah ha u bnai ba la dep ban pyrshah ïa ka jinglong nongialam jong u Starmer, u la ong ba un iakhun ha ka jingiakhun lada ka don.
U Starmer u la ai khublei ïa u Burnham ha ka sngi palei, hynrei u la ban jur ba un ialeh pyrshah ïa kano kano ka jingpyrshang ban pynhap ïa u.
“Ngan ialeh, ngan ieng”, lada don ka jingiakhun nongialam jong ka Labour, la ong u Starmer. “Nga la ong bunsien ba ngan ym iaid lait na kata.”
Hynrei u Charlie Falconer, uba dei u dkhot ba rangbah jong ka seng Labour jong ka ïing dorbar, u la ong ha ka sngi Saitjain ba u Starmer um don bor satia kaba sah.
