Jerusalem, Jylliew:
U Myntri kam poh ïing jong ka Israel, u Israel Katz, haba ai jingkren sha ki nonthoh khubor ha ka Sngi U Blei, u la ong ba ki shipai Israel ki ioh ïa ka mon laitluid ban shim ïa kano- kano ka rai ban pynduh- pyndam ïa ki jingma ha Lebanon, da kaba bynrap ruh ba ki shipai ki dang don ha kito ki bynta ba ka Israel ka khot kum ki jaka pahara kiba ka dang peit-bniah ban pynbit- pynbiang ïa ka jinglong- jingman ha kitei ki thaiñ.
Ka jingsangeh thma bad ka Hezbollah, kaba la kyrshan da ka Iran, ka la sdang treikam ha ka sngi Palei, hadien bun bnai jong ka jingjur jong ki jingkulmar, hynrei ha ka sngi saitjain, ki jinghiar thma jong ka Israel, ki la pyniap ym duna ïa ka 20ngut ki briew ha Lebanon, ong ka khubor jong ka NNA jong ka tnat pathai khubor jong ka Lebanon.
Ka Israel, ka ong ba kitei ki jing thombor, ki dei kum ka jingkynthoh ïa ki bom, kiba la siat da ka kynhun, kaba la kyrshan da ka Iran, sha ki shipai jongka, ha ka thain shathie jong ka Lebanon, kaba la pynlong ïa ki jing thombor ïa kaei kaba uwei u heh jong ka Israel, ula batai kum ki thong jong ka Hezbollah.
Ki heh jong ka Iran, ki la ong ba ka Lebanon ka dei ka jaka pdeng jong ka jingïakren ïasuk bad ka America ha ka Sngi U Blei ha Switzerland hadien ba ka Washington bad ka Tehran ki la ïasoi ïa ka kyndon ban pynsangeh ïa ka thma hapdeng jong ki kaba la sdang ha kaba kut jong u bnai February, kaba la pynjur ïa ka jingkulmar ha kylleng ka thaiñ.
Ki shipai Israel ki la hiar thma ïa ki bynta jong ka Lebanon kaba shathie. Ka Hezbollah ka pynskhem ba ka don ïa ka hok ban ïakhun pyrshah ïa ki shipai Israel ha Lebanon, tangba kan pynsangeh noh ïa ki jinghiar thma ïa ka thaiñ shatei lam mihngi jong ka Israel.
U Katz u la ong ba ki shipai Israel kin dang sah ha baroh ki jaka ha kaba ki khot ka jaka pahara, kaba jrong kumba 10 km (6 mile) sha ka bynta ba shathie jong ka Lebanon.
Ka Israel ka ong ba kata ka long ban iada ïa ki jaitbynriew Israel ba shatei lam mihngi.
“Baroh ki jingjop jong ka IDF ha ka jingïakhih ha Lebanon la pynneh pynsah, ha kaba ki shipai jong ngi ki don ha ka jaka pahara ha shilynter u Yellow Line ha Lebanon bad ki treikam naduh hangta shapoh pyrshah ïa ki lehnoh bad ki jingtei jong ki lehnoh,” u la ong ha ka jingpynbna jong ka sngi U Blei.
