Venezuela, Jylliew:
Ka President ba shipor jong ka Venezuela, ka Delcy Rodriguez, ha ka miet Sngi Balang ka la pynbna ia ka jingdonkam ban long adkar ha katei ka ri, hadien ba u jumai uba 7.2 bad 7.5 Magnitude ka jingkhlaiñ u la pynkhynñiuh ia ka nongbah Caracas jong katei ka ri ha ka miet Sngi Balang, ha kaba ki iingmala kiba don ha katei ka nongbah ki la khyllem bad julor bun.
Kumjuh ruh na ka liang jong ka tnat liengsuiñ katei ka ri, ka Simon Bolivar International Airport (CCS), ka la pynsangeh noh ia ka jingleit- jingwan hadien ba ka bynta ba shalor jong katei ka Kad Liengsuiñ ka la twa bad hap sha madan.
Namarkata, katei ka nongialam jong katei ka ri, ka la kyntu ia ki paidbah nongshong shnong jong katei ka nongbah Caracas ba kin long phikir bad kin ym khuslai ne sheptieng, naba ka sorkar kan ialeh ban pynbit- pynbiang ia ki jingïarap bad jingdonkam jongki bad ka la kyntu ruh ia ki ba kin iatreilang bad ki bor pyniaid bad ban ialong kawei naka bynta ka jingmyntoi jong baroh lang. Nalor kata, la pynsangeh noh shuwa ruh shipor ia baroh ki jingpule da kumba katto- katne sngi, katba ka jinglong- jingman ha katei ka thaiñ kam pat ibiang bha.
U Rodriguez u la kyrpad ruh ïa baroh ki nongtrei ka koit ka khiah ha ka ri ba kin leit sha ki hospital ban ïarap ïa kino kino kiba mynsaw.
Kat kum ka jingkheiñ jong ka US Geological Survey (USGS), utei u jumai ba nyngkong uba la kot ia 7.2 magnitude ka jingkhlaiñ, u la pynkhynñiuh ia ki bynta phang pdeng kaba don sha ka phang Sepngi jong ka shnong Moron, kaba jngai kumba 168 kilomitar shaphang sepngi jong ka Caracas. Ka jingjylliew jong utei u jumai, ka long 21.9 kilomitar. Hapoh 39 sekhon, sa kawei pat ka jingkhynñiuh jong u jumai uba ar, uba la kham jur shuh-shuh haduh kumba 7.5 magnitude ka jingkhlaiñ, ka jingjylliew jong u ka la long haduh kumba 10 kilomitar eiei shapoh ka khyndew.
Ka USGS ka la batai ia ki ar tylli ki jingkhynñiuh jumai kum ka “jingkhynñiuh jumai ba shuwa” bad “ka jingkhynñiuh jumai ba kongsan.”
“Kane ka jingkhynñiuh jumai ka dei ka jingjia kaba nyngkong eh ha ka jingkhynñiuh jumai kaba arsien, ïa kane ka jingkhynñiuh jumai kaba heh 7.2 la bud tang hadien 39 sekhon da ka jingkhynñiuh jumai kaba kham heh kaba heh 7.5,” ong ka USGS.
Katba kane ka President ba shipor, ka Rodriguez, kam shym la ai ia ka jingkheiñ ba tikna jong kiba khlad bad mynsaw, ka jingkheiñ jong ka tnat pat USGS ka pyni ba ka jingiap ki briew na utei u jumai, ka lah ban long naduh 10,000 haduh shi lak ngut.
Ha ka Jylla Falcon, U Lat ka jylla u Victor Clark u la iathuh ba 32 ngut ki briew ki la shah sumar ha ki jaka sumar bad palat saw kynta hadien ka jingkhie jumai ki dang don sa 15 ngut kiba sahkut.
U Gustavo Duque, u Mayor jong ka Chacao municipality ha Caracas, u iathuh ba bun tylli ki jingtei, ki la twa, bad la sei ia 18ngut kiba lait im, tang na kawei ka jingtei. U la kyntu ia ki nongshong shnong ban wad jaka rieh bad jingiarap ha ki plaza paidbah namar ki lah ban don ki jingkhie jumai hadien.
“Ngin sa leh ia kaba donkam baroh ban pyllait im ia kiba bun ki briew katba lah”, u la ong, kumba la iathuh da ka tnat pathai khubor.
Ka US ka la ai jingiarap ia ka jaitbynriew jong ka South America, da kaba ong ba ka “ieng ryngkat bad ki paidbah ka Venezuela hadien ki jingkhynñiuh jumai ba shyrkhei mynta ka janmiet.”
