Shillong, Nailur:
U nongwad RTI ba paw ka Jylla, u Bah Disparsing Rani u la ong ba ha ka jingïohi la sakhi ba ka rukom pyntrei ïa ki surok hapoh ka Jylla Meghalaya, la lap ba kiba bun napdeng ki kontraktor hapoh ka Jylla kim don ïa ki tiar ki tar ne ki ‘machineries’ kiba biang nalor ba kim pat don ka jingtbit ha ka kam.
Haba kren sha ki lad pathai khubor ha Shillong Press Club ha ka 17 tarik Nailur 2024, u Bah Disparsing u la ong ba ka jingbym don ïa ki tiar ki tar bad ka jingtbit ha ka kam ka pynlong ïa ka kam ba kan sahkut bad ba yn nym lah ban pyndep ha ka por ba biang.
Haba pynpaw lyngba ki lad pathai khubor ïa ki jubab RTI halor ka jingpyntrei ïa ka surok na Mawphlang sha Weiloi bad ka surok na Umlyngka sha Mawklot ba ka rukom pyntrei ka long kaba suki shaba palat, u Bah Disparsing u la ong ba ka dei tang ka Dhar Construction Company kaba biang ki tiar ki tar katba kiwei pat kiba pyntrei ïa ki kam, kim pat biang satia ïa ki tiar ki tar.
“Ka dei halor kata ka nongrim ba ka kam hapoh ka Jylla Meghalaya kam ju ïaid bad kam ju lah ban pyndep hapoh ka por ba biang namar kumba ka long mynta ngi ïohi ba tang ki Dhar Company kiba don ïa ki tiar kiba biang katba kiwei te kim don ïa ki tiar kiba biang ban pyntrei ïa ka kam”, la ong u Bah Disparsing.
U Bah Disparsing u la ong ba ka jingpyntrei ïa ki surok kam ïaid bha mynta la shisnem tam namar ka jingbym don ïa ki tiar ki tar ba biang bad kumba ka long ruh, la ïohi ba ka jingpyntrei ïa ka surok na Umlyngka sha Mawklot ka la wanrah ka jingeh kaba khraw bha ïa ki paidbah nongleit nongwan ha kaba kiba bun ki khynnah skul ki la mynsaw tang na ka daw ka jingsied ki maw bad shitom na ka jing pum-pum eh ka surok.
“Kane ka long ruh ka ‘Yellow Card’ ne ka jingmaham sha baroh ki kontraktor ba haba ki trei ïa kano-kano ka kam ki dei ban biang ïa ki tiar ki tar namar ka pisa ka dei ka pisa jong u paidbah bad kam dei ka pisa shimet jong ki ba kin pyntrei ïa kam khlem ki tiar kiba biang namar ha kaba kut hi, ki shem jingeh ki paidbah”, la bynrap u Bah Disparsing.
Halor ka RTI kaba la thep halor ka surok na Mawphlang sha Weiloi, u la ong ba u la ïoh pdiang ïa ka jubab hadien 6 bnai tam eiei bad u la ong ba ki dang sahkut sa da ki spah tylli ki RTI kiba u la wad ha kaba um pat ïoh ïa ki jubab haduh kine ki sngi bad ka daw jong kane ka jingpynslem ban ai ïa ka jubab ka dei namar ba lehse, kim pat don ïa ka jingtbit ban leh ïa ka RTI ne ka don kaei-kaei sha lyndet jong kane.
“Shibun bah ki RTI kiba nga wad ki dang sahkut bad nangne shakhmat, nga la wad ki lad ki lynti, nga lah ban ai noh da ka FIR ïa ki briew kiba pynjah klep ïa kane ka RTI da ki spah tylli”, la ong u Bah Disparsing.
U la ong ruh ba ka jingpyntrei ïa ka surok na Mawphlang sha Weiloi ka khlem ïaid satia katkum ka Detail Project Report (DPR) ka wanrah ïa ka jingduh jingmyntoi kaba khraw bha ïa ki paidbah ka Jylla namar la shu pynlut phut ïa ka pisa katba ka kam pat kam poi shano-shano.
