Jowai, Nailur 19
Ki ar ngut rangïalehkai, u Cornelius Suchiang bad Dangri Phawa ki la ïoh hat-trick na ka bynta ban pynlong ïa ka Madankynsaw Mawkyndeng ban pynjem khnap ïa ka Caroline haduh 7-0 kol ha ka lympung ïalehkai Second Division Football Tournament (7th Debo Shullai Memorial Trophy).
Ha kane ka jingïakhun kaba la long ha ka Sngi Palei ba la pynïaid da ka West Jaiñtia District Sports Association (WJDSA) ha madan Kiang Nangbah Stadium, Jowai, u Cornelius Suchiang u la ïoh ban thep kol ha ka minit kaba 5, 27 & 71, katba u Dangri Phawa u la thep kol ha ka minit kaba 37, 54 & 63 bad la bynrap da u Heiwamut Lamare ha ka minit kaba 68.
Ha ka jingïalehkai kaba khatduh jong kane ka sngi, ka Nangbah Dukhu ka la pynliem noh ïa ka Dongmihsngi da 3-1 kol. Ïa ki kol jong ka Nangbah Dukhu la thep da u Banteilang Iongwai ha ka minit kaba 40+1 bad Nathan Biate u la thep ar kol ha ka minit kaba 51 & 83. Katba ka shi kol jong ka Dongmihsngi la thep da u Remember Langstang ha ka minit kaba 65.
