Bhubaneswar,Nailur:
Ha kum kane ka por ba dang jur ka jingbitar bad ka jingpyni nia halor ka jingshah thombor jong uwei u heh shipai bad ka briew kaba u la ïateh ktien kaba la jia ha ka jaka treikam jong ki pulit ka Bharatpur ha kaba la shem ba kam shym don ïa ki CCTV Camera, u DGP YB Khurania u la dawa da ka kaiphot na ki jaka treikam jong ki pulit kiba don ha ka jylla ki bym shym don ne buh ïa ki Camera ne halor ka jingbuh ïa ki kor ki bym treikam shuh.
Ïa ka ïing kaba thymmai jong ki pulit ka Bharatpur la plie ha u bnai Lber jong une u snem. Ïa ka jaka treikam jong ki pulit la pyntreikam na ka Outpost na ka bynta ki lai snem. Kumba la ïathuh ka tyllong khubor kaba la wan na ka jaka treikam jong ki pulit la ong ba ka dang bteng ban tohkit halor ka daw ba balei ym shym la buh ïa ki CCTV Camera ha kane ka ïing jong ki pulit kaba la dep shna thymmai.
Kumba la ïathuh ka tyllong khubor kaba la wan na ki pulit, la ong ba u Khurania shen un sa leit ban jurip bniah ïa ki jaka treikam jong ki pulit ki bym shym don ïa ki CCTV Camera bad ïa kito kiba buh ïa ki kor kiba la sniew bad ki bym treikam shuh.
Kumba ka dei ban long, la ong ba yn sa shim ïa ki sienjam na ka bynta ban buh bad pyntreikam ïa ki Camera ha ki jaka treikam jong ki pulit. Katkum ka jingbuh jingkheiñ jong ka Bureau of Police Research and Development’s (BPRD) ha ki jaka treikam ki pulit ba la pynmih ha basdang u bnai jong une u snem, ka jylla ka la don ïa kumba 679 tylli ki jaka treikam jong ki pulit kumba ka long ha ka 1 tarik, Kyllalyngkot, 2023. Kumba la antad la ong ba ka jingdonkam ban buh ïa ki CCTV Camera kan long da kumba 13,647 tylli. Hynrei ki la don tang kumba 11,887 tylli ki CCTV Camera ba la buh ha kylleng ki 591 tylli ki jaka treikam jong ki pulit haduh ka 1 tarik, Kyllalyngkot, 2023.
Katkum ka kaiphot, la ong ba ïa ki 1,760 tylli ki CCTV Camera ym pat lah ban buh ha kiba bun ki jaka treikam jong ki pulit ba don ha kylleng ka jylla. Kumba la ïathuh ka tyllong khubor la ong ba ki la don baroh kumba 684 tylli ki jaka treikam jong ki pulit ïa kiba la mang bad shna da ka sorkar Odisha haduh mynta bad napdeng kine 680 tylli ki dei kiba la pyntreikam. Ha kaba ïadei bad kane, kiba bun na ki jaka treikam jong ki pulit ïa kiba la dep ban plie ha ki ar snem ba la lah kim shym don ïa ki CCTV Camera.
