Vijayawada, Nailur:
U Myntri Rangbah jong ka Andhra Pradesh u N Chandrababu Naidu u la dep ban pynbna ïa ka bailutksan sha ki lanot shlei um ha Vijayawada bad na ka bynta ki nongrep kiba la shah ktah jur na ka jingjulor jong ki jingthung jingtep namar ka jinghap jong u slap ba jur ha ka jylla.
U Naidu ha ka jingïakren bad ki nongthoh khubor u la ong ba ki la don baroh kumba 2,72,727 tylli ki longïing kiba la shah ktah na ka jingshlei um ha Vijayawada.
U la ong ba baroh ki ïing kiba la ngat ha ka jingtap jong ka um, kiba hap hapoh ka jingkhmih jong ka 179 Sachivalayams, kin sa ïoh ïa ka jingïarap pisa kaba `. 25,000, katba `. 10,000 yn sa nang pynkiew na ka bynta kito ki ïing kiba la shah tap um ha ka mala kaba nyngkong.
Ki ïing kiba la shah tap ha ka um ha ka mala kaba ha madan kiba don ha kiwei pat ki bynta jong ka jylla kin sa ïoh ïa ka jingïarap pisa kaba mar `. 10,000. Ha ka jingong ba kane ka dei ka sien kaba nyngkong ban pyllait ïa ka song tyngka ba la pynbna, u la ong hashwa, ba ka jingïarap na ka bynta ka jingshah ktah ha ki bor ka mariang ka la long tang `. 4,000 na ka bynta kawei ka longïing.
Na ka bynta ki dukan rit bad ki ïingbasa, u Naidu u la ong ba da mar `. 25,000 yn sa nang pynkiew, katba na ka bynta kiba kum kine ki jaka ba la shah ithuh bad ki MSME yn sa pynïoh hapoh ka `. 40 lak shi snem ha kaba yn sa siew mar `. 50,000. Ka jingpynmih na ka bynta ban ai jingïarap hapdeng ka `. 40 lak bad `. 1.5 klur yn sa siew mar `. 1 lak bad na ka bynta kito ïa kiba la mang da palat `. 1.5 klur yn sa siew mar `. 1.5 lak.
Ha kaba ïadei bad ki jingthung jingtep, u la ong ba ka bailutksan kan long `. 25,000 ha ka 1 hectare ha kaba yn sa pynkiew na ka bynta ki nongrep kynphad, ki shana budam, u kew bad u pai, katba `. 15,000 1 hectare yn sa ai na ka bynta kiwei pat ki jingthung.
Ha kaba ïadei bad ki jingjulor jong ki kali, u Myntri Rangbah u la ong ba na ka bynta ki trai jong ki kali ar shaka yn sa ai mar `. 3,000, katba `. 10,000 yn sa ai na ka bynta ki trai jong ki kali saw shaka, bad ki kali ba ñiat hi yn sa pynshna da kiba thymmai.
Shuh shuh, la ong ba u la pynbna ruh ban map ïa ka ram jong ki nongrep kiba ha ki thaiñ ba shah ktah na ka jingshlei um ha kaba yn sa ai ïa ka bailutksan da mar `. 25,000. Shuh shuh, u Naidu u la pynbna da kaba ong ba na ka bynta ki nongtong dohkha yn sa ai jingïarap da `. 9,000 lada ki la shah ktah ha baroh ki liang kynthup halor ka jingjot jong ki jar tong dohka bad `. 25,000 na ka bynta ki jingjulor ha kiba bun. Na ka bynta ki pung ri dohkha, u Myntri Rangbah u la pynbna da `. 18,000 ban ai jingïarap lada dei halor ki jingjulor ha 1 hectare, katba na ka bynta ki nongpynmih ‘sai ryndai yn sa ai da `. 25,000 ha ka 1 hectare.
Ka bailutksan kaba mar `. 50,000 la pynbna ban sa ai na ka bynta ki jingïap jong ki masi, ki muid, `. 40,000 na ka bynta ki masi lur bad `. 25,000 na ka bynta ki masi khun. Nalor kine, u Naidu u la pynbna ïa ka jingai jingkyrshan pisa sa ha kiba bun kiwei pat ki bynta, kiba ïadei bad ki jingduhnong jong ki nongshong shnong na ka jingshlei um.
