Cairo, Nailur:
Katkum ki khubor, la ong ba ka jingther bom jong ka Israel sha kawei ka skul ba pynshong ia ki ‘riew paidbah ha ka Sngi U Blei, ka la shim ia ka jingim jong 7 ngut ki ‘riew paidbah kiba don ha katei ka jaka. Katba ka tnat shipai Israel pat ka la kam ba ki shipai ka Israel ki thmu ban thombor ia ki dkhot ka Hamas kiba don ha katei ka jaka.
Katei ka jingleit ther bom jong ka Israel ka la long ha ka skul Kafr Qasem School kaba don ha ka thaiñ Beach bad kane ka la jia ha ka step Sngi U Blei ha ka por kumba 11 baje. Uwei napdeng kitei kiba khlad, u dei u heh ka tnat Public Works & Housing Minister jong ka Hamas- u Majed Saleh. Kumta, na ka liang jong ka tnat ïada ka Israel ka la iathuh ba ka la leit ban ther bom sha katei ka jaka ha katei ka step tang mar ia ioh jingtip ba kitei ki nongialam ka Hamas ki don bad ki phet rieh ruh sha kitei ki jaka ba don ki riew paidbah khnang ba ka Israel kan ym tip bad kan salia ban leit hiar thma.
Hynrei, na ka liang jong ka Hamas, ka la kyntait ia ki jingkynnoh jong ka Israel ba ki lehnoh Hamas ki pyndonkam ia ki hospital bad ki skul ne ki jaka pule jong ki ‘riew paidbah, khnang ba kin ioh ban pynlong jaka rieh ialade bad ba ki lait na ki jingthombor jong ka Israel. Kane ka jingjia ka long ruh hapdeng ka jingiakynad kaba la sdang jur hapdeng ki lehnoh Hezbollah jong ka ri Lebanon bad ki shipai ka Israel kaba la neh slem mynta naduh ba ka Israel ka la leit ban kput ia ki lehnoh Hamas hapoh ka nongbah Gaza.
Ha katei ka sngi, la ong ba 6 ngut ki nong Palestine ki la khlad ha kawei pat ka jingshah ther bom ha ki liengsuiñ ka Israel sha ka phang pdeng bad ka phang South jong ka nongbah Gaza. Kumta, ka jingdon jong kiba khlad na ka thma jong ka Israel ha kylleng ka nongbah Gaza ha katei ka Sngi U Blei ka la poi kumba 16 ngut baroh. Haba iadei bad kane, la ong ba naduh ba sdang jong ka jing-leit hiar thma ka Israel sha nongbah Gaza, ka kynhun lehnoh Hezbollah ka la pynpaw ia ka jingai jingkyrshan ba ratbah ia ka kynhun lehnoh Hamas kaba long ka paralok jongka na Palestine bad kumta ruh ka la leit ban thombor ia ki bynta khappud jong ka Israel na ka por- sha ka por.
, kum shi bynta ban pynpaw ia ka jingkyrshan jongka ia ka Hamas ha katei ka thma bad ka la dawa ruh ia ka Israel ba ka dei ban sangeh noh shi syndon ia ka thma hapoh Gaza lada ka kwah ban lait na ki jingma jong ka thma bah kaba jur.
