Venezuela, Jylliew:
Ki kynhun iarap jong ka Venezuela ha ka Sngi Palei, ki la ialeh shitom ban pyllait im bad ban leit wad ia baroh kito kiba ngat ha u jumai bah ba shyrkhei, uba la shim ia ka jingim jong 230 tam ki briew.
La ong ba ha utei u jumai, bun bah ki iingmala kiba la orpait, don ruh kiba la julor bad don ruh kiba la twa noh syndon, ha kaba ka tnat Geological Survey jong ka US ka al iathuh ba utei u jumai u la lynshop ia katei ka ri haduh 2 sien, ha kaba nyngkong u la pynkhynñiuh da ka jingkhlaiñ kaba 7.2 magnitude bad uba 7.5 magnitude ha ka sien kaba ar.
Kumta, la ong ba ki paidbah ha kylleng jong katei ka nongbah, ki la iohsngew ia ka jingkhynñiuh kaba jur ha katei ka Sngi Palei bad u Myntri ka tnat ka koit- ka khiah, u Carlos Alvarado u la iathuh ba ka jingdon kiba khlad na utei u jumai ka la kiew na ka 188 ba la ai jingkheiñ hashwa, sha ka 235 ba la dep pyntikna da ki kynhun iarap bad ka tnat ka koit- ka khiah.
Palat 1,500 ngut ruh ki la shah ktah bad mynsaw ha ka jing lynshop jong utei u jumai bah uba la pynkhynñiuh jur ia katei ka ri ha katei ka sngi.
Ki jingpyrshang ban pyllait im ki la nang iaid suki- suki, ha kaba dang ioh sei shuh-shuh ia ki met iap napoh ki thliew- ki syar bad ki kynrum- kynram ba la julor jong ki iingmala ba la twa.
Ha kawei ka nongbah kaba don ha ka Jylla La Guaira kaba la shah ktah jur bha, kaba don shaphang shathie jong ka Caracas, ki nongshong shnong ki la sngap khlem lah ban iarap ei ei katba kawei ka samla kynthei ka la pyrta ban pan jingiarap da ki kynta.
“Ngi donkam ia ki briew…, ki shipai, ban wan iarap khnang ba ngin lah ban pynmih ia ka,” la ong u nongshong shnong u Dani Rizo, 48 snem ka rta.
Ym slem hadien kata, katei ka khynnah ka la khlad noh, la iathuh ki nongshong shnong ha ki nongthoh khubor.
Ha kawei pat ka jaka ha La Guaira, la iohsngew ia lai ngut ki briew ha ki thliew jong kawei ka iing kaba la twa.
“Ki dang im… Ym don eiei shuh kaba ngi lah ban leh”, la ong uwei u nongshong shnong, u Antonio Bermudez. “Ngim don ki tiar. Ngim don lad ban iarap.”
U doktor jong ka Domingo Luciani Hospital ha ka nongbah, uba kren khlem da kwah ban pynpaw kyrteng, u la ong ba ki khynnah ki wan poi ha ki kali kit nongpang marwei hadien ba la sei ïa ki na ki thliew ba la jot.
