New Delhi, Jylliew:
U Vice- President ka US, u JD Vance, ha u Kyllalyngkot jong u snem ba la leit, u la wanrah ïa kane ka jingtyrwa ban pynbor ïa ka Russia ba kan sangeh thma bad pynkut noh ïa ka jingleit hiar thma sha Ukraine hynrei la ong ba ïa kane ka jingthmu jong u, la pynsangeh bad khanglad noh da u President ka America hi- u Donald Trump.
Namar la ong ba u Trump u la jop ïa ka ilekshon ha kane ka samoi ba mynta ruh, dei lyngba ki jingkular jong u ban pynkut bad pyniasuk noh ïa ka Russia bad ka Ukraine tang mar ïa ioh shong ha ka khet synshar ba hakhlieh duh jong ka US. Hynrei kat haduh mynta ruh, u Trump um shym la lah ban wanrah ïa ka jingiabeit bad ka jingiasuk hapdeng kitei ki arliang mamla, pynban ka US ka la nang lam khmat shuh- shuh pynban sa ha kiwei de ki thma bad ki jingkynshoit ban pynkhie thma ïa kiwei de ki ri jong ka thaiñ Middle East.
Ha katei ka por, U Trump, u la pynlong ïa ka jingialang, ha kaba la iadon lang da u Lieutenant General Keith Kellogg (retd), u nongrah ktien ba kyrpang jong ka Russia bad ka Ukraine- ban rai ïa ka bynta jong ka US, ban pynkut noh ïa katei ka thma.
Ka jingthmu jong u Kellogg – ‘Ka Historic Peace Deal’ jong u Trump, ka la kyntu ïa ki shipai pynneh jingsuk jong ka ri Bilat, France bad Dutch.
Hynrei u Vance u la pyrshah ïa ka jingpyndonkam ïa ki shipai jong ka NATO. U la ong ba ka lah ban pynkhihwin ïa ka Russia, kaba la pynpaw ïa ka jingbym shaniah ïa katei ka kynhun. Ha ka jingshisha, shi taiew mynshwa u myntri kam bar ri jong ka Russia u Sergey Lavrov u la ong ba ki shipai NATO kin long ki bym lah ban pdiang satia.
Katkum u Haberman bad u Swan, nangta u Vance u la kylli: “Hato don ki shipai na kiwei pat ki ri (i.e., shabar Europe) kiba lah ban shakri ïa kane ka jingthmu?” Bad u Vance nangta la iathuh ba u la ai jingmut ïa ka India. U Trump u la rkhie bein, la ong ka kot. “Ki nong India kin nym leh ïa kata… kin nym siew ïa kaei kaei kaba kum kata,” u la ong, bad u la kren shaphang ka jingiadei paralok jong u bad u Myntri Rangbahduh ka ri u Narendra Modi.
Na ka liang jong ka sorkar India, ka la bat ïa ka nongrim kaba iahap halor ka thma ha Ukraine, da kaba khot ban pynkut noh syndon ïa ka jingialeh bad ban don ka jingiakren kaba suk ban pynbeit ïa baroh ki jingeh.
Ha u Rymphang jong u snem 2025, u Modi bad u Trump ki la ïakynduh ha nongbah Washington, D.C. ban ïakren shuh shuh hynrei baroh ki la long lehnohei.
Kane ka long hadien katto katne sngi jong ka jingialang ha White House kaba la batai bniah ha ka kot. Ka tnat bar ri ka la pynkynmaw biang ïa ki jingkren jong u Myntri Rangbahduh: “… ym don lad ban weng ïa kano kano ka jingialeh ha madan thma… kane kam dei ka juk jong ka thma.”
Ia ka jingkylli ban phah ïa ki shipai pynneh jingsuk ym shym la kren shai satia da ka sorkar India, wat la hadien ar bnai u MP ka Congress u Shashi Tharoor u la wanrah ïa katei ka phang.
Ha u bnai Risaw u la ai jingmut ba ka Delhi ka lah ban phah ïa ka kynhun shipai kaba rit lada bad lano yn pynbna ïa ka jingsangeh thma kaba la kular da u Trump. “Peit shabar jong ka Europe na ka bynta ka jingpynneh ïa ka jingsuk jong phi… kane ka dei ka jaka ba ka India ka lah ban wan rung,” u la ong ha ka jingialang shimet ha Delhi.
Ki shipai India ki ju shakri ha ki kam pynneh jingsuk. Ha ka jingshisha, ka don shibun ka jingshemphang, namar ba ka la trei bad ka United Nations ha South Sudan, Somalia, bad Lebanon, ha kine ki phew snem ba la dep, bad kumjuh ruh ha kiwei pat ki ri kiba shah ktah ha ki jingialeh.
