Singapore, Jylliew:
Uwei u nong India uba la 35 snem ka rta, u la shah kem bad shah pynngat kyndon ha ki bor ka aiñ jong ka Singapore, ha kaba la rai ban set patok ia u 6 bnai namar ka jingleh khlemakor jong u ia kawei ka nongtrei jong ka tnat liengsuiñ jong katei ka ri.
Katkum ki khubor ba la ioh lum, la iathuh ba u Akash Tiwari, ryngkat bad 4 ngut ki paralok jong u, ki don ha katei ka liengsuiñ kaba wan poi na Thailand bad ki ju rkhie beiñ ia kat ki nongtrei kynthei kiba shim kyrteng bad kiba ïaid lyngba najan jongki.
Hadien ba kawei ka nongshim kyrteng ka la leit sha ka jaka shong jongki, ban kylli halor ka jingjied jongki ia ka jait jingbam ba ki mon, u Tiwari u la kyrbeit ia ka kti jong u bad syrpud ia ka lbong jongka bad kitei ki paralok jong u pat ki shu iapeit bad rkhie ia katei ka jingleh jong u.
Hynrei la ong hadien ba katei ka nongshim kyrteng ka la leit ujor sha ki nongpeit ba kham heh jong katei ka liengsuiñ, ka la shah pynkynriah noh sha kawei pat ka bynta jong ka liengsuiñ. Watla katta, hadien ba ka la wan phai biang ban leit lum noh ia ki synduk buh jingbam ba la dep pyndonkam da ki nongshong liengsuiñ, u Tiwari u la sdang ban ktah bad pyndei biang ia ka, da ka tymbuit nadien jongka.
Kumta, katei ka nongshimg kyrteng ka la leit ujor biang sha u heh nongpeit jong katei ka liengsuiñ.
Hadien kata, u Tiwari u la kyntait ba um shym la leh eiei kaba bakla pyrshah ia katei ka nongtrei bad uwei na kitei ki paralok jong u pat, u dang rkhie tahah bad ong ba u la dei ban shim da ka jingdih ‘beer’ ban peitkai pynmyllen ïalade ia ka jingitynnad jong katei ka jingjia.
Ka Lynda, ka nongpeit ba kham halor jong kitei ki nongtrei liengsuiñ, ka la iathuh ba katei ka nongtrei ka la sngewsih bha halor ka jingshah ktah kti bad jingshah leh khlem-akor jongka ha utei u briew bad watla katta, utei u briew u la kyntait jur ba u khlem da leh eiei ia ka. Nalor kata, la ong ba u Tiwari u rkhie sammut bad um shym la pan map tdot ia katei ka nongtrei wat hadien ba ka la sngap noh ia kitei ki jingkyntait jong u.
Hynrei, hashwa ba katei ka liengsuiñ ka la dei ban hiar noh, katei ka nongpeit ba kham halor ka la pyntip sha u captain lane u nongialam jong katei ka kynhun nongtrei jong ka liengsuiñ halor kaei kaba la jia baroh. Ynda la hiar, u Tiwari u la bud-dien ia ka sha ka jaka ba don ki nongtrei bad u ieng ruh mar syndait badka, ha kaba, katei ka nongtrei ka la maham ia u ba u dei ban jngai na ka hynrei u ialeh ban tur sha ka wat hadien ba ka la phet na katei ka jaka.
Hadien kata, ia u Tiwari la kem noh ha ka por ba katei ka liengsuiñ ka la poi ha ka Kad liengsuiñ ha Changi Airport, ha kaba ki heh jong ka Airport Police Division ki la leit ban kem bad tohkit bniah halor kaei kaba la jia baroh ha katei ka liengsuiñ ha katei ka sngi.
Kane ka la jia ha ka 9 tarik jong u bnai Rymphang, hynrei la ong ba u Tiwari u dang shah rai pynshitom haduh mynta bad u la shah pynngat hapoh ki kyndon pynkheiñ aiñ jong ka jingleh khlem-akor bad ka jingpynthud ia ka shongsuk- shongsaiñ ki kynthei. Nalor kata, la rai ruh ban set patok ia u haduh 6 bnai bad kane ka la sdang treikam naduh ka Sngi Nyngkong.
Ha kajuh ka por, la ong ba u Tiwari u la shah bthah ba u dei ban siew ia ka jingshah daiñ kuna kaba 90,000 Tyngka sha katei ka nongshah leh beiñ ban long ka jingsneng ia u namar ka jingwanrah jingma ia ka leit- ka wan bad ka kam- ka jam jong katei ka nongtrei.
