Washington, Jylliew:
Ka ïingbishar ba haklhieh duh jong ka US, ha ka Sngi Palei ka la ai jingkyrshan ïa ka sorkar u Trump halor ka jingpynduh noh ïa ki hok jong ki nongleit buhai shnong sha US, kiba dei na ki ar tylli ki ri kynthup ïa 3,50,000 ngut ki nong Haiti bad 6,000 ngut ki nong Syria kiba shong- ba sah hapoh United Staes.
Ka rai 6-3 jong ka ïingbishar kaba la synshar da ki nongïalam tynrai ka lah ban ktah ïa palat shi million ngut ki nongïoh jingmyntoi na kaba la khot ka jinglong ba la ïada shipor (TPS) na palat shispah tylli ki ri.
U Justice Samuel Alito, uba ka jingmut kaba bun jong u, ka la ïasoh lang bad ki phra ngut kiwei pat ki nongbishar kiba ïadei bad ka Conservative, u la ong ba ka rai jong ka tnat Homeland Security ban pynkut noh ïa ka TPS na ka bynta ki nong Haiti bad Syria kam shym la hap ha ka jingbishar bniah jong ka ïingbishar.
Ka TPS ka iada ïa ki nongbat jong ka na ka jingshah beh shnong bad la ai sha ki briew kiba la shim ba ki don ha ka jingma lada ki wan phai sha la iing namar ka thma, ka jingshah pynjulor ha ka mariang ne kiwei kiwei ki jingjia ba phylla.
Ki nongiasaid aiñ na ka bynta ki nongbat TPS na Haiti bad Syria ki la ialeh pyrshah ha ka por ba ki ïa kren lyngkot ha u bnai Risaw ba ki jinglong jingman ha la ka jong ka ri ki dang long ki bym shngain bad kane ka jingleh jong ka bor synshar ka dei kaba la pynlong la kumno kumno ha kawei ka bynta na ka jingsngew pyrshah jaitbynriew.
U Alito u la kyntait ïa ki jingkynthoh ba ka jaitbynriew ka dei ka “jingpynshlur” ha ka rai jong u President Donald Trump ban weng noh ïa ki nong Haiti ïa ka kyrdan TPS.
“Ym don kawei ruh na ki jingkren ba la kdew da u President ne u Sekretari (Ka Pynïada Ri) kaba la pynpaw pyrthei ïa ka jingïapher jaitbynriew, bad ha ka jingshisha baroh ki la pynpaw ïa ki jingmut polisi kiba lah ban shong ha ki jingpynshisha ba ïadei bad ka jingïapher jaitbynriew,” la thoh u Alito.
U Trump u la ïalap ilekshon na ka bynta ka White House halor ka jingkular ban beh noh da ki million ngut ki nongwan buhai shnong bad u la pynbor ban pynduh noh ïa ka prokram TPS kum shi bynta jong ka jingpynkhreh kaba kham heh jong u ïa ki nongwan buhai shnong.
Ha ka por ba jur bha ka jingïakhun ilekshon president jong ka snem 2024, u president ka Republican u la pynmih ïa ka jingtieng halor ki nongwan buhai shnong na Haiti da kaba kam lamler ba ki bam ïa ki mrad ba ri jong ki nong America.
La weng noh ïa ka kyrdan TPS ïa ki nongshong shnong jong ka Afghanistan, Cameroon, Ethiopia, Honduras, Myanmar, Nepal, Nicaragua, Somalia, South Sudan, Venezuela, Yemen, bad kiwei nalor ki nong Haiti bad Syria naduh ba u Trump u la shimti ïa ka shuki.
Ki nong Haiti ki la long kiba bit ban ioh ïa ka TPS ha u snem 2010 hadien ka jingkhynñiuh jumai kaba la pynjot bad ka ri ka dang iai bteng ban mad ïa ka jingduk kaba jur, ka jingshah thombor kaba jur bha na ki kynhun runar kiba don tiar ialeh bad ka jingbym shongsuk shongsain ha ka sain pyrthei kaba neh slem.
Ka tnat kam pohïing ka ai jingmut ïa ki nong America ba kim dei ban leit sha ka ri Caribbean “namar ka jingshah rahbor, ki kam runar, ki jingïakynad paidbah bad ka jingbym biang ka jingsumar pang.”
