Paris, Jylliew:
Ki bor pyniaid ka France ki la rai ban khang noh ia baroh ki jait jingdih pynbuaid lane ki kyiad naka bynta ki paidbah nongshong shnong jong ka nongbah Paris naduh ka Sngi Thohdieng, hadien ba ki hospital ha kylleng jong katei ka nongbah, ki la sakhi ia ka jingjur ka jingleit poi ki nongthiah pang namar ka jingjur palat ka jingshit bad jingkhluit jong ka suiñ bneng.
“Ngi la poi sha ka jingdap ha ki jaka sumar,” ong u heh pulit jong ka Paris, u Patrice Faure, da kaba bynrap ba “ka jingdon jong kiba shah sumar ha ki jaka sumar, ka nang kiew.”
“Nga dei ban pyntikna ba ka jingpynshitom kan hiar,” u la ong, da kaba jer ia ki lad ki lynti ban lait na kum kita.
Ka jingdih kyiad ha surok bad kiwei kiwei ki jaka paidbah bad kumjuh ruh ka jingdie kyiad takeaway yn khang naduh ka sngi palei, la ong u Faure ha ki nongthoh khubor.
Ka hukum, kaba la pynmih ha ka sngi Thohdieng, ka khang pyrshah ia ki paidbah ban dih kyiad hapdeng ka por 12 baje mynmiet jong ka sngi Palei bad ka por 7 baje mynstep jong ka sngi Saitjain, bad hapdeng ka por 12 baje shiteng sngi jong ka sngi Saitjain bad ka por 7 baje mynstep jong ka sngi U Blei.
“Kane ka jingkhang kam treikam ia ki jaka jong ki jaka paidbah kiba ju shong da ki jaka bam bad ki bar kiba don ia ki kot ki sla kiba donkam,” la ong ka tnad pulit jong ka Paris.
Kumta la ong ba ki bor pyniaid ki la khang ban die kyiad naduh ka por 6 baje janmiet jong ka sngi Palei haduh ka por 7 baje mynstep jong ka sngi Saitjain bad naduh ka por 6 baje janmiet jong ka sngi Saitjain haduh ka por 7 baje mynstep jong ka sngi U Blei.
“Kane ka jingkhang ka treikam ruh ia ki dukan die marbam kiba die kyrpang ia kum kine ki jingdih,” la ong ka hukum.
U Faure u la ong ba ka kynhun pynlip ding jong ka Paris ka la ïohi ba ka jingïarap jongka, ka la kiew ar shah, ha kaba ka la poi sha palat 2,500 tylli ki nongwad jingïarap ha ka Sngi Palei.
