Shillong, Nailur 24
Hadien lai bnai ka jingpynkhreh, ka kynhun ïalehkai ka ri India kan sdang ïa ka lympung ïaknieh jong ka AFC U20 Asian Cup China 2025 ka ban ha Vientiane, Laos.
Kane ka kynhun ka la don ha ka Group-G kan sdang ïa ka jingïalehkai kaba nyngkong ha ka Sngi Balang ha Lao National Stadium KM16 ha ka por 2.30 baje janmiet pyrshah ïa ka Mongolia. Ki kynhun kiba pawnam na kawei pa kawei ka kynhun, ryngkat bad ki phra tylli ki kynhun kiba wan ha ka kyrdan ba ar kiba bha tam na ki 10 tylli ki kynhun kin ïoh ban rung sha ka lympung kaba dei.
U coach ka India u Ranjan Chaudhuri u la batai ïa ki jingthmu jong ka kynhun jong u ha kaba sdang jong ka jingïalang bad ki nongthoh khubor shwa ka lympung ïalehkai. “Ngi la pynkhreh bha ha kine ki lai bnai ba la dep, bad ki khynnah shynrang ki la pynkhreh na ka bynta kane ka jingïakhun.”
“Ka jingthmu jong ngi ka long ban rung sha ka AFC U20 Asian Cup ha ka sien kaba nyngkong, ka ban buh ïa ka nuksa kaba khraw na ka bynta ki khynnah shynrang jong ngi. Ym tang ba kan long ka jingïakynduh kaba bha na ka bynta jong ki baroh, hynrei kan buh ruh ïa ka India ha ka kyrdan jong ka Asia ha kane ka kyrdan jong ka rta,” u la bynrap.
Haba ïakhun pyrshah ïa ka Mongolia ha ka jingïalehkai kaba nyngkong, ka India ka angnud ban sdang ïa kane ka lympung ïaknieh (qualifier) da kaba kamai lai poiñ.
“Ka jingïalehkai kaba nyngkong jong kano kano ka lympung ka long kaba kongsan bha, bad ngi dei ban pynthikna ba ngin ïoh lai poiñ na ka. Kata kan buh ïa ka sur na ka bynta jong ngi”, la bynrap u Chaudhuri. “Ka Mongolia ka dei ka kynhun kaba tbit bha, bad ngi hap ban ïalehkai bha, hynrei ngin pyrshang ban pynneh ïa ka jingpyrkhat jong ngi bad ban ïai long kiba khlaiñ.”
Ka India ka la poi ha Vientiane ha ka janmiet jong ka lah sngi U Blei bad hadien ka jingjahthait kaba bha, ka kam kaba nyngkong eh jong ka Chaudhuri ha ka step jong ka sngi Balang ka long ban lum lang ïa ka kynhun baroh kawei bad ban pynbna ïa u Thomas K. Cherian kum u kapten.
